Uzğan şimbädä Tatar mädäni üzägendä Mäskäwneñ Başqortstan yaqtaşları dip atalğan oyışma barlıqqa kilüe turında xäbär itelde. Başqortstan yaqtaşları oyışması 2000 yıldan birle oyışa almıy aptırağan ide. Nihayät bu oyışma räsmi yaqtan da terkälgän, häm anıñ tarafdarları da baytaq qına cıyılğan ide mädäni üzäkkä. Başqortstan yaqtaşları oyışması ber millätne genä berläşterüne genä küz aldında totmıy. Oyışmağa tuğan cire Başqortstan bulğan törle millät keşese dä äğza bulıp kerä ala. Oçraşuğa kilüçelär şul uq könne äğlälek biletların da aldılar. Bügenge köndä Mäskäwneñ törle yuğarı uqu yortlarında Xalıqlar duslığı universitetı bulsın, Gnesinnar isemendäge muzıka akademiäse, yä bulmasa Şçepkin isemendäge teatr uçilişçesında 100 artıq Başqortstan balası uqı. Şuña küräder Başqortstan yaqtaşların täqdim itü oçraşuına alar da küpläp kilgän ide. Şunda uq ike studentqa Başqortstan prezidentı stipendiäse dä tapşırıldı.Häm yäş talantlar köçe belän konsert programması da kürsätelde. Başqortstan yaqtaşları oyışmasınıñ citäkçese itep. Zamanında Başqortstannıñ wäkälätle wäkil urınbasarı bulıp eşlägän Tälğät Khuramşin bilgelände. Tälğät Khuramşin milläte belän tatar. Äle SSSR zamannarında ministr bulıp eşlägän, sotsialistik xezmät geroyı isemenä layıq bulğan şäxes. Min añar berniçä soraw belän möräcäğät ittem. Berençe sorawım, nihayät oyışma terkälgän, xäzer inde plannar niçek dip soradım. Ul - plannar zurdan, tik nıqlap oyışıp kitü kiräk. Yärdämçelärebez dä küp. Bezneñ oyışmağa törle millät keşese kerä. Bügen bezne tatar mädäni üzäge sıyındırdı. Alğa taba oçraşularıbıznı Mäskäwneñ millätlär yortında ütkärerbez dip uylıybız dide. (audio)
Äytkänemçä oçraşuda studentlar da küp ide. Xäzer sezneñ iğtibarğa täqdim iteläçäk Azamat Äbdülmänov Başqortstan prezidentı stipendiäsenä layıq bulğan. Tik bez anıñ belän söyläşkän waqıtta ul äle bu xaqta belmi idek. Azamatnıñ Mäskäwdäge Başqortstan studentları berläşmäse digän oyışmanıñ da citäkçese buluın küz aldında totıp, min annan Mäskäwdäge studentlarğa bu oyışma närsä birer dip uylıysız, bu oyışmanıñ eşen niçek küz aldına kiteräsez dip soradım. Anıñ belän bulğan äñgämäne qısqaça ğına kitergändä. Azamat, qatnaşıp yörü ber närsä. Bezgä bergä-bergä üsärgä kiräk. Balalarnı başqortça öyrätüne, oyıştırırğa kiräk. Yaqtaşlar oyışmasında artistlar belän oçraşunı da, xökümät keşeläre belän küreşüne dä planlaştırırğa kiräk dip uylıym dide.Häm ul universitetnı tämamlağannan soñ Başqortstanğa qaytmayaçağın. Mäskäwdä qalaçağın belderde. Tik tuğan yaq belän bäyläneşlär härwaqıt bulırğa tieş, dide. (audio)
Şulay itep Mäskäwdä tağın ber ictimaği oyışma Başqortstan yaqtaşları oyışması barlıqqa kilde. Mäskäwdä inde Başqortstan dip atalğan Mäskäw häm Mäskäw ölkäse başqortların berläştergän ber oyışma bar ide. Tik tatar milli mädäni üzägendä ütkän bu oçraşuda ul oyışmadan ber genä citäkçe dä kürenmäde. Alar xaqında ber genä süz dä bulmadı.
Näzifä Kärimova, Mäskäw
