Tatarstan wäkilläre bu könnärdä, Mäskäwdä, Dumada ütkän parlament tıñlawlarında qatnaşıp qayttı. Andağı parlament tıñlawlarında milli mäğlümat çaralarınıñ eşenä qağılışlı mäs’älä qaralğan. Älege «tügäräk östäldä» milli mäğlümat çaraları, demokratiäneñ üseşe häm süz iregen nığıtu faktorı dip täqdim itelgän. Älege çaranı Dumanıñ millätlär eşläre häm mäğlümät säyäsäte komitetları oyıştırğan bulğan. Parlament tıñlawlarında Rusiäneñ mädäniät häm massaküläm mäğlümat çaraları ministrı Aleksandr Sokolov ta çığış yasağan. Mäğlümat ağentlıqları xäbär itkänçä, ministr Sokolov «Mäğlümat çaraları turındağı qanun» iskergän, aña üzgäreşlär kertergä kiräk, dip beldergän bulğan. Anıñ fikerençä, milli mäğlümat çaralarınıñ üseşe bulsın öçen, däwlät yärdäme kiräk. Millätlär eşläre komitetı başlığı, Evgeniy Trofimov Rusiäneñ milli säyäsäte turındağı qanunnıñ äzerlänüen xäbär itkän. Ul milli matbuğatnıñ üseşenä etärgeç birergä tieş, dip äytkän Evgeniy Trofimov. Parlament tıñlawlarında Tatarstannan «Tatmedia» agentlığı başlığı Marat Moratov çığış yasağan. Ul, tügäräk östäldä qatnaşuçılarnı Tatarstannıñ rayon häm milli gäzitlärgä däwlät yärdämen kürsätüe turında söylägän bulğan häm töbäklärgä üzlärenä, milli mäğlümat çaraların oyıştıru xoquqın birü mäs’äläsen kütärgän. Fin-uğır xalıqlarınıñ matbuğatı belän xäl awır dip äytelsä, Tatarstannıñ milli matbuğat belän eşläw täcribäse täräqi itep tanıldı, dide bezgä Tatarstannan saylanğan deputat Änbär Karmeev. Anıñ äytüenä qarağanda, Dumada milli mäğlümat çaraları mäsäläläre, mäğlümat säyäsäte komitetında, ayırım yünäleşkä bülenep qarala. Karmeev xäbär itkänçä, parlament tıñlawlarında qabul itelgän täqdimnär arasında milli mäğlümat çaralarına finans yärdäm kürsätüne federal häm ayırım töbäk byudjetlarına kertergä digännäre dä bulğan. Milli mäğlümat çaralarınıñ yäşäyeşe, üseşe, Rusiä öçen bik möhim, dide Anbär Karmeev. Anıñ fikerençä, milli mätbuğat federal däräcädä mäğlümat säyäsätenä tä’sir itä, Tatarstannıñ milli matbuğatı Rusiäneñ mäğlümat qırına aktiv ütep kerde inde.
Bikä Timerova
