Accessibility links

Кайнар хәбәр

Qazan merı İlsur Metşin ay yarımğa bilgelände



Qazan merı Kamil İsxaqov Qolıma yaqlarına Putinnıñ wäkile bulıp bilgelängängä sanawlı ğına könnär ütte. Ä Qazan xalqı, kem äytmeşli, başlıqsızda, başsız da qalmadı. Tatarstan prezidentı Mintimer Şäymiev pänceşämbedän yaña başlıq quydı. Qazanğa. Ul İlsur Metşin, Tübän Qamada älegä qädär şähär başlığı bulıp tordı. Ä bit äle, cirle üzidarä tözibez digän bulıp, deputatlar saylap, şul saylanğan deputatlar, Kamil İsxaqovnı mer itep saylap quyğannar ide. Bu ni soñ bu, başlıqlar saylanamı, ällä inde, elekkege kebek quyalamı?

Qazan merı urınına yaña keşe şulay tiz arada bilgele bulır dip kemdä kötmägän ide. Xäyer, Kamil İsxaqovnıñ da Qolıma yaqlarına Vladimir Putin wäkile bulıp kitüe dä bit kinät kenä mäğlüm buldı. Säyäsät bu. Ä säyäsätne küzätep barırğa tırışuçılar, törle farazlar birüçelär, Kamil İsxaqov urınına xäzergä Qazannıñ İdel buyı rayonın citäklägän Räfis Borhanov bulır dip äytep kildelär. Звезда Поволжья gäziteneñ soñğı sanında, Räşit Äxmätov mäsälän, ТАТЭНЕРГО citäkçese Färdiev Qazan başı bulır digän faraz yasağan ide. Kamil İsxaqovnı Qazan dumasına deputat itep saylağan Wahapov okrugınnan Färdiev deputat bulıp saylanır da, şunnan anı Qazan merı itep saylarlar dip. Xäyer, İlsur Metşinda şuşı uq sistema buylap mer känäfien aluı ixtimal dip yazdı Räşit Äxmätov. Qazan başlığı känäfienä İlsur Metşinnıñ yulı alay ozın-ozaq bulmadı. Pänceşämbedä, Tatarstan prezidentı İlsur Metşinnı Qazan başlığı itep bilgeläw turında färman çığardı.

Ber qızıq xäl. Tatarstanda üktäber ayında cirle üzidarälärgä saylawlar buldı. Şunda saylanğan deputatlar awıl, rayon, şähär başlıqların soñraq saylap quydılar. Qayber rayonnarda, glavalar yañadan başlıq bulıp saylanu tügel, xätta deputat ta bulalmadı. Qazanda da buldı bu saylawlar. Wahapov okrugınna şähär dumasına deputat itep Kamil İsxaqov qayber rayon glavalarınnan ayırmalı bularaq, deputat itep saylandı. Soñraq, sep-svejiy saylanğan, iske yäğni tanış yözle deputatlar, yaña qanun buyınça, Qazan başlığın sayladılar. Prezident ta säyäsiläşmägän keşe ul dip Kamil Şamil ulın maqtağaç, İsxaqov buldı inde glava. Yäğni mer. Äle bu waqiğağa ike atnalap qına waqıt ütte. Yäğni Qazannıñ başlığı saylanğanğa. Ä bilgelängängä tügel . Bit Rusiäneñ yaña qanunnarı buyınça, başlıqlar saylana, bilgeläp quyılmıy.

Pänceşämbedä Qazan başlığı bulıp İlsur Metşin bilgelände. Säyäsät bu. Xikmätle säyäsät. Bu bilgeläwneñ dä xikmäte bar. Saylanğan deputatlar da, saylağan glavalar da, yaña yıldan soñ ğına eşkä totınalar. Munitsipal berämleklär turındağı qanun şul çaqta ğına ğämälgä kerä. Ä älegä, bilgeläp quyu turındağı qanunnar ğämäldä. Tatarstan prezidentı Metşinnı şuşı , tizdän ğämäldän çığaçaq qanunnarğa nigezlänep bilgelägän. Menä böten xikmäte. Ä inde, yaña yılğa qädär waqıt bar. Yäğni, 2006 yılnı saylanğan başlıqlar belän tormışnı başlarğa digän qanun ğämälgä kergänçe. Deputatta bulır Metşin, mer da bulır. Hiç yuğı, küzätüçelär şundıy farazlar yasıy.

Ä Qazan xalqınıñ başı, başlığı bulğan İlsur Metşinnıñ üzenä kilgändä, anı bik cawaplı häm qırıs keşe dilär. Eş buyınça qırıs. Tübän Qamada öç yıl buyına imam möxtäsib bulıp torğan , Qol Şärif mäçete imamı, Ramil Yunıs, Metşin belän bik tığız xezmättäşlektä bulğan keşe. Azatlıqqa ul bolay dip belderde:

Öç yıl buyına bez anıñ belän bik tığız eşlädek. Şähärneñ tarixi mäçeten tözekländerü diseñme, awıl cirlärendä mäçetlär tözü kebek eşlärdä bergä eşlädek. Ul bik eşlekle häm eş buyınça qırıs, taläpçän keşe

Ramil Yunıs buldı. Qol Şärif mäçete imamı.

Metşin üze, 1969 yılda tuğan. 26 yäşendä waqıtta, Qazannıñ Sovet rayonı administratsiäse apparatın citäklägän. Annan soñ, ber yıl buyı İdel buyı rayonında zam, yäğni urınbasar bulıp torğaç, Tatarstan prezidentı 29 yäşlek Metşinnı Tübän Qama rayonına başlıq itep cibärä. Färman belän. Respublika säyäsi moxitenä yaqın bulğan keşelärneñ süzlärenä qarağanda Şäymiev Metşinnı üsterer öçen, şulay Tübän Qamağa cibärä. 16 noyäberdä, kem äytmeşli, tarix 2005 tä 36 yäşlek İlsur Metşin Qazanğa başlıq itep bilgelände.

Qazan şähär xakimiäte belän Tatarstan xakimiäte arasında nindider ütä dä neçkä konkurentsiä dip äytikme, yarışmı, bar ide. Monısın gel, bäysez çığanaqlar äytä kilde. Yazdılar da. Kamil İsxaqov belän Mintimer Şäymiev yarışı, köräşe dip. Xäzer isä, şuşı uq çığanaqlar, Qazan tulısınça Mintimer Şäymiev komandasına küçte dip belderälär. Metşin Şäymiev keşese. Mäsälän, Независимая газета soñğı sanında şulay dip beldergän ide. Prezident şuşı üzeneñ keşesenä, Qazannıñ uñ yaq yarında matur zamança şähär tözergä tieşseñ dip taläp quyğan. Bu kvartal yaqları inde. Yäğni, ul yaq üzgärergä, maturayırğa tieş, ä üzäk isä, üzeneñ serle, tarixilığın saqlarğa tieş. Kamil İsxaqov waqıtında, üzäk bik qızıq üzgärde. Küp kenä tarixi yortlar yuqqa çıqtı, urınnarına yaña, pıyala binalar barlıqqa kilde. Qayber uramnar tulısınça çüpräk pannolardan ğına tora ide. Metşin İlsur nilär kürsäter, Qazannıñ ikençe meñ yıllığında kürerbez, boyırğan bulsa.

Räfis Cämdixan.

XS
SM
MD
LG