Rusiäneñ däwlät tele-radiokompaniäse, cirle bülekçälärendä mäğlümat öçen cawaplı redaktorlarnıñ cıyılışın ütkärde.Älege seminarda, mäğlümatnı niçek täqdim itü, yaña şartlarda eşläw turında süz bardı. «Tatarstan» tele-radio kompaniäse «Rossiä» kompaniäseneñ cirle bülekçäsenä äwerelgäç, efir säğätläre, tapşırularnı sanı qısqarğan ide. Xäzer dä, milli respublikalarda eşläwçe tele-radio kompaniälär öçen efir waqıtın üzgärtü turında söyläşülär bara. Tatarstan mäğlümat qırında üz urının alıp qalğan «Tatarstan» televideniese häm radiosı tapşırularınıñ kiläçäk yazmışı turında Rusiä däwlät tele-radio kompaniäseneñ cirle bülegendä radio öçen cawaplı citäkçese Täwfiq Sağitov belän söyläştek. Anıñ äytüenä qarağanda, xäzerge waqıtta, «Tatarstan» radiosında ayına urtaça 144 säğät radio tapşırular äzerlänä, alarnıñ 70% tatarça bara, 30% - urısça. Mäğlümat tapşırularınıñ sanı artqan, alarnıñ yartısı tatarça, yartısı urısça bara. Ä mädäni-ädäbi programmalar tulısı belän tatarça bara, dip söyläde Täwfiq Sağitov. Bu utırışta, tağın balalar tapşıruları öçen östämä waqıt alu xaqında söyläşü alıp barabız, dide ul. Efir waqıtları qısqarsa da, çittäge tatarlar öçen maxsus äzerlängän «Tatarstan dulqınında» tapşıruı da saqlanıp qalğan, aña köndä 50 minut waqıt birelä. Mäskäw kompaniäseneñ cirle filialı, dip sanalsa da, «Tatarstan» respublika byudjetınnan, maxsus milli tapşırular äzerlängän öçen aqça bülenep birelä. Şulay uq, kompaniäneñ binasın remontlaw häm yaña studiäne cihazlawnı finanslawda Tatarstan häm Rusiä öleşçä qatnaşa.
Bikä Timerova.
