Accessibility links

Кайнар хәбәр

Alğa - Könçığışqa!


Xäzer Yıraq Könçığış kamilläşä digän xäbär çıqtı. Qazan şähäre başlığı Kamil İsxaqov Çukotka, Saxalin, Magadan başlıqlarınıñ üzlären yunältergä Putin tarafınnan cibärelde. Comğa kiçendä ul Mäskäwgä kitte, annarı almaş kiemnären, azıq-töleklären ikençe oçqıçqa töyep, Xabarovskiy yaqlarına oça. Xäyerle yul dip qalsaq, Kamil İsxaqovtan da aldaraq tağın zurraq şul uq Şärıqqa yul totqan bulıp çıqtı. Rusiä Prezidentı Vladimir Putin, Tatarstan prezidentı Mintimer Şäymievnı, başqa säyäsi, iktisadi elita wäkillären iärtep, şulay uq Yıraq Könçığışqa kitte. Kön'yak Koreya mämläkätendä iqtisatı xezmättäşlek turında zur söyläşü bulaçaq. İske-mosqı yapon maşinaların zur-zur korabl'lärgä töyep, Naxodkağa alıp qaytuçı eşquarlarnı äytep tä tormıym. Qayçandır dekabristlar şul yaqlarğa sörgengä cibärelgän, Stalin zamanında Kalıma, Magadan yaqlarına säyäsi elita tovar vagonnarına töyep ozatılğan. Yuq, bitaraf tügel bezneñ xalıq Yıraq Şärıqqa. Axırı niçek bulır. Äle bit Çita ölkäseneñ yıraq ber rayonında bik iple häm tärtiple törmädä kiem tegärgä öyränep, doktorlıq dissertatsiäsen yazıp utırğan Xodorkovskiy da bar. Qısqası, Rusiäneñ Yevropa öleşendä qızıqlı häm ğibrätle şäxeslär, waqiğalar sirägräk oçrıy.

Şulay da original fikerle zatlar bar. Bu atnada böten Rusiä teleradiokompaniäseneñ wäkilläre Qazanda cıyılıp kiñäş tottılar. Efir dulqının Mäskäwgä tapşırğaç niçek itep zamançaraq eşlärgä. Xäyerlegä bulsın anısı. Ber qızğaç borçaqnı muldan ürçettelär. Tatarinform şundıy xäbär çığardı. VGTRKnıñ Qazandağı filialı “Tatarstan” teleradiokompaniäse Rusiäneñ tatar diasporasına yärdäm itäçäk ikän. Monısı inde äkämät. Bu filiallaştıru, üzäkläşterü näticäsendä Çiläbedä, Irınburda, Yekaterinburgta, başqa bik küp töbäklärdä cirle kanallarda tatarça tapşırular yabıldı yäki qısqardı. Tatarstandağı filialnıñ da däräcäse töşep, mömkinlekläre qısqardı.Xäzer inde “Azatlıq” radiosınıñ tapşıruları ozın dulqınnarında Qazan aşa retranslyatsiälämi. Niçek itep tatar diasporası, döresräge töbäklärdäge tatarlar monnan läzzät alırğa tieş ikän?

İñ originalı – Rusiä duması deputatı Mitrofanov. Şuşı LDPR wäkile tatu dip atağan häm qoçaqlaşıp cırlıy torğan xalıqlar duslığı ordenı belän büläklärgä täqdim itkän. Döres, censi xislärne bik üzençälekle itep şou biznes bazarında yaltıratuçı bu qızlarnıñ däwlät aldındağı xezmätlären moña qädär añlatuçı bulmadı, ämma LDPR deputatı Mitrofonov duetın büläklärgä kiräk dip sanıy. Comğa könne Dumada bu turıda qızu ğına bäxäs tä bulıp aldı. Mitrofanovnıñ şuña açuı kilä ikän – şul ordennarnı ber kem belmägän keşelärgä taratudan ni fayda. Ataqlı keşelär xalıqlar aldında däwlätne kütärä dip sanıy ul. Xäyer, LDPRnıñ citäkçese tağın da kübräk keşe belä, aña medal' kvartal sayın tapşırılırğa tieş bulıp çığa. Monısına da ğäcäplänäse tügel, Jirinovskiyğa birelgän ordennar, maqtawlı isemnär, däräcäle isemnär bolay da yañğır bulıp yawa ikän. Ni öçen ikänen üzegez çamalağız.

Menä şundıy xikmätle zamanda yäşibez. Ägär dä çınnan da baliğ bulmağan bu qızlar ber-berseneñ qulın totışıp cırlağan öçen ordenğa layıq bulsalar, yaña ğına poçet ordenı medale belän büläklängän möxtäräm F.Möxämmätşinğa nişlärgä? Tatarstan parlamentın citäkläp, küpme zakonnar äzerlägän millättäşebez bötenläy başqa säyäsi ülçämdä. Ä anı Tatuşkalar belän tigezlämäkçelär. Komi-Permyäk okrugınıñ administratsiä başlığı Gennadiy Savel'yevqa orden birgännär. Gennadiy äfände citäklägän okrugnı Perm ölkäsenä quştılar da, anıñ üzenä orden tottırdılar. Monı niçek añlarğa inde?

Axırda xikmätle bäyrämnär, kalendar' waqiğaları turında. Bu atna axırında Sankt-Peterburgta berençe tapqır aldınğı illärdän küçerelgän zur bäyräm ütkärelä. Böten şähär bädräflär köne. Çistalıq, ädäplelek, sälämätlek şiğar'läre astında ütä torğandır inde ul. Şäp bit. Ä menä başqa awı-şähärlärgä nişlärgä? İke çaqrımğa ber bädräf oçramıy torğan qalalar, rayonnar yäisä çoqır qazıp, tişek-moşıq taqtalardan yunätelgän salqın bädräflär. Mondıy zamança bäyrämdä qatnaşa alamı ikän? Ä menä yubileylar ışanıçlıraq bäyräm. Uzğan pänceşämbedä xalıqara tämäkene taşlaw könendä Qazan universitetınıñ 201 yıllığı bilgelänep ütte. Üze näq studentlar könendä. Universitetnıñ politolgiä kafedrası üzeneñ danlı 15 yıllığın ütkärde. Respublikabıznıñ bik zatlı ber mäğlümat çarası 85 yıllığın ütkärergä äzerlänä. Politologlar belän jurnalistlarnıñ bäyrämnären bergä quşsañ 85+15, näq 100 kilep çığa bit. Mondıy täcribäne Yıraq Şärıqtağı tundrağa da taratırğa kiräk. Ä menä Parijdağılar qalışa anda, küñelsez talaşlar kilep çıqqan. Berläşkän millätlär oyışmasınıñ YUNESKO dip atalğan abruylı oyışması şunda urnaşqan. Bu atnada anıñ tözelüenä näq 60yıl tuldı. YUNESKO bäyrämen iskä aluçı da bulmadı. Şuşı uñaydan berqayda da tantanalı cıyılış yäki banket ütkärelmäw başqa sıymaslıq xäl bit. Menä şundıy xikmätle zamanda yäşibez.

Rimzil Wäli

XS
SM
MD
LG