Accessibility links

Кайнар хәбәр

Omskida “Berdämlek” festivale häm grantlar konkursı ütte


Omskida 1998-nçe yıldan birle gubernator färmanı belän oyıştırılıp kilgän “Berdämlek” milli mädäniätlär festivaleneñ yomğaqlaw konsertı sişämbe könne şähärneñ muzıkal' teatr binasında ütte. Mondıy festival' mädäniät ministrlığı häm “Duslıq yortı” tarafınnan inde altınçı märtäbä oyıştırıla häm anda ölkädä eşläp kilüçe üzeşçän sänğät kollektivlarınıñ küpçelege qatnaşa. Bıyılğı festival'neñ yomğaqlaw konsertında çığış yasağan kollektivlar sanı 64-kä citte, qatnaşuçılar sanı 700 dän artıp kitte. Elekke yıllardan ayırma bularaq bu çarağa bıyıl Novosibirskidan, Qazaxstannıñ Petropavlovski häm Semey şähärlärennän tatar, yäxüd häm qazax kollektivları da kilgän idelär. Konsert programması “Tormış yaqtılığın saqlawçı çişmä” dip isemlände. Anda rus, tatar, qazax, ukrain, belarus', fin, qıtay, yähüd, ärmän häm başqa qayber milli kollektivlar ayırım bloklarğa bülenep çığış yasadılar.Tatar blogında Omskinıñ “Umırzaya” häm “Ömet” kollektivları, Ust'-İşem rayonınıñ “Çişmä”, Tara şähäreneñ “Nur”, Kolosovqa rayonınıñ “Mäxäbbät” ansambl'läre “Sabantuy” küreneşen kürsättelär. Alarğa kürşe töbäklärdän kilgän qunaqlar – Novosibirski tatar mädäniät üzäge citäkçese Rauza Tixomirova, Semey şähäreneñ tatar sänğät mäktäbe direktorı Gabdelxak Axuncanov quşıldı.

Konsert barışında festival' qunaqlarğa häm rayonnardan kilgän kollektivlarğa üzara aralaşırğa da mömkinlek buldı. Qazaxstannıñ Petropavlovskidan qazax kollektivı belän kilgän Räsimä Zakirova şähärlärendä “Duslıq” tatar ansamble eşläwe turında söyläde. Alarnıñ Omskinıñ tatar kollektivları belän elemtälär urnaştırırğa teläkläre buluı turında da äytte. Semey şähärennän kilgän qunaq - Gabdulxak Axuncanov ta tatarlarnıñ uzara aralaşuları ike yaq öçen dä ähämiäteme dip sanıy.

Festival' barışında ölkäneñ yıraq rayonnarınnan kilgän tatar kollektivları da oçraşıp söyläşergä, fiker alışırğa waqıt taptılar. Taranıñ “Nur” ansamble citäkçese Rauşaniä Kurmanova soñğı waqıtta başqarğan eşläre, alda torğan eş plannarı belän tanıştırdı, küptän tügel genä açılğan balalar studiäseneñ uñışlı ğına eşli başlawı turında belderde. “Nur” ansambleneñ rayonnıñ tatar awıllarında konsertlar belän bulıp qaytuı, başqa rayonnarnıñ tatar kollektivları belän dä kileşep eşläwläre turında söyläde Rauşaniä xanım. Ul rayonnıñ Olı Uış awılında Kolosovqa rayonınıñ “Mäxäbbät” ansamble zur programmalı konsert kürsätüe turında da belderde.

Ölkäneñ tönyağındağı Ust'-İşem rayonınnan kilgän “Çişmä” ansamble häwäskärläre dä üzläreneñ uy-fikerläre turında söylädelär, festival' kebek ğomum çara qatnaşularınnan qänäğät buluların belderdelär.

Äytergä kiräk, “Berdämlek” festivaleneñ yomğaqlaw konsertı zur külämdä, şaw-gör kilep , küñelle ütte kebek. Qatnaşuçılar da, tamaşaçılar da anı bäyräm itep qabul ittelär. Ämma ikençe küzlektän qarağanda, şundıy zur köç häm küp çığımnar talap itkän bu çaranıñ ayırım millätlär üseşenä ni däräcädä faydası bulır digän soraw da tumıy qalmıy.

Şulay itep, Omskida milli mädäniätlär üseşe bötenläy finanslanmıy dip äytep bulmıy. Döres, cibärelgän finansnıñ küp öleşe asılda älege festival' kebek ğomum çaralarğa totıla. Annan tış ayırım millätneñ “Berdämlek” festivale qısalarında ütkärelgän ber-ike çarası öleşçä finanslana. Ämma biredä dä şart quyıla, älege çaralar ölkä programmasına kertelgän bulırğa tieşlär. İctimaği oyışmalarnıñ tağın ber finans yärdäme alu mömkinlekläre bar. Bu çığanaq – grantlar konkursında qatnaşıp, uñışqa ireşü. Ämma, grantlar konkursı lotereya uyının xäterlätä. Yazıp birelgän eş proyektı çinovniklar tarafınnan möhim dip tabılsa, kürsätelgän programma öçen bilgele ber külämdä summa birelä. Başqaça milli oyışmalarğa byudjettan ber nindi dä finans cibärelmi.

Bıyıl da Omskida grantlar konkursı oyıştırıldı. Anda 82 ictimaği oyışma 120 proekt belän qatnaştı. Şuşı könnärdä genä älege konkursqa yomğaq yasaldı. Aldan bilgelängän şart duyınçada 20 proyekt qına ciñüçe dip tabıldı. Programmasın tormışqa aşıru öçen här proyektqa 50 meñ rubl' aqça bireläçäk. Añlaşıla ki, ciñmägän proyektlarğa ber nindi dä yärdäm kürsätelmäyäçäk. Bıyılğı grantlar konkursında tatar şähär milli mädäni moxtariäte dä 4 törle proyekt belän qatnaşqan ide. Qızğanıç, moxtariätneñ ber programması da ciñügä ireşmäde. Şulay itep, tatar moxtariätenä aldağı yılda da eşçänlegen üz köçenä genä tayanıp alıp barırğa turı kiläçäk.

Saniä Mixaleewa, Omski

XS
SM
MD
LG