Tatar xalqınıñ böyek qızı, kürenekle cırçı Färidä Qudaşeva bu könnärdä üzeneñ 85 yäşlek kürkäm yubileen bilgeli. Atnakiç könne anıñ fatirı irtädän alıp kiçkä qädär keşedän özelmäde. Respublika citäkçeläre, mädäni oyışmalar wäkilläre, Çişmä rayonınnan kilgän yaqtaşları Färidä Qudaşevağa zur-zur çäçäklär bäylämnäre, istälekle büläklär tapşırdı.
Tatar xalqınıñ moñ alihäse, sanduğaçı ilneñ küp töbäklärennän qotlaw telegrammaları da aldı häm bügen dä ul täbriklämälär kilüe däwam itä. Xalıq cırçısın matur yubiley belän Başqortstan Prezidentı Mortaza Räximov belän Tatarstan prezidentı Mintimer Şäymiev, şulay uq Tatarstannıñ mädäniät ministrı Zilä Wälieva, Bötendönya Tatar kongressı Başqarma komitetı räise Rinat Zakirov häm başqa kürenekle keşelär qotladı häm iñ ixlas teläklären citkerde.
Yubiley aldınnan Färidä Qudaşeva törle yärdämçelär bulışlığı belän zur xezmäten dönyağa çığardı. Başqortstan “Kitap” näşriätendä anıñ tormış yulına häm icatına bağışlanğan zur külämle bik matur fotoal''bom näşer itelde. Anda moñarçı berqayda da basılmağan fotosurätlär dä bar. Kitapta şulay uq xalıq cırçısınıñ icatı xaqında küp sanlı yazmalar, şağirlärneñ aña bağışlap yazğan baytaq şiğerläre dä urın alğan.
“Azatlıq” radiosı xäbärçese dä talantlı şäxes belän oçraşıp, yubiley uñayınnan berniçä soraw belän möräcäğät itte. “Üz yazmışımnan bik qänäğätmen, - di Färidä xanım. – Xoday birgän talantım arqasında sänğät yulınnan kittem häm ğömerem buyı cır dönyasında yäşäp, xalıqnıñ söyenä, tirän xörmätenä ireştem. Moñardan da zurraq bäxet bula almıy. Şuña da älege yubileemnı da yaxşı käyeflär belän qarşı aldım. Yaratqan tamaşaçılarım xäzer yubiley kiçäsendä oçraşuıbıznı kötä. Şuña äzerlek xästärleklären başlıym”.
Tatar xalqınıñ mäşhür cırçısı Färidä Qudaşeva buldı bu. 15 dekaber könne aña 85 yäş tuldı. Xalıq cırçısınıñ yubiley kiçäse Ufada näq ike aydan soñ, fevral'' urtasında zurlap ütkäreläçäk. Anda Tatarstannan häm başqa töbäklärdän küp kenä qunaqlar da çaqırıla.
