Accessibility links

Кайнар хәбәр

Mintimer Şäymiev respublika, Rusiä häm çit il jurnalistları belän oçraşaçaq


22 dekaber, pänceşämbe könne Tatarstan Prezidentı Mintimer Şäymiev respublika, Rusiä häm çit il jurnalistları belän oçraşaçaq. Anda Rusiä töbägendä çığuçı tatar mäğlümat çaraları çaqırılğan. Tatarstan Prezidentı tämamlanıp kilüçe 2005 yılnıñ iñ töp yomğaqları turında jurnalistlar belän fikeren büleşäçäk. 1000 yıllığın uzdırğan Qazan Rusiädäge säyäsi wäzğıätkä zur tä'siren iskä alğanda älege oçraşu törle dairälärdä zur qızıqsınu uyata. Şunsı iğtibarğa layıq, bu oçraşuda Başqortstanda çığuçı tatar mäğlümat çaralarınıñ wäkilläre bulmıy, çönki bezgä bilgele bulğança, “Tatmediya” agentlığı Başqortstannıñ “Qızıl Tañ” gäzite häm başqa basma möxärrirlären çaqırsalar da, alarğa Qazanğa kilergä röxsät birelmägän. Şuña kürä, Başqortstandağı tatar basmaları törle säbäp tabıp bu könne Ufadan kilmi. Şunısı qızıq, “Tatarstan yaña ğasır” telekanalınıñ, “Xäyerle irtä, Tatarstan” tapşıruında “Qızıl tañ” gäziteneñ çirattağı sanına küzätü birep bara. Dimäk, Başqortstan xakimiäteneñ räsmi orğanı bulğan “Qızıl Tañ” gäzite Tatarstannıñ sputnik tele kanalı aşa Rusiä häm çit illärdä üzenä reklam yasıy. Häm şul gäzit wäkilenä ğomum tatar problemaların tikşergän matbuğat cıyılışına kilü röxsät itelmi. Qazan yağınnan mäğlümat öçen täräzä häm işeklär açıq qala, ä monıñ belän qullanu, yäki qullanmaw ikençe mäs'älä.

Gölnaz Şäyxetdinova

XS
SM
MD
LG