20nçe dekaber kiçendä, Qazannıñ ber tönge klubında, 2005 yılda iñ uñışlı turistik marşrutları bilgeläw buldı. Mondıy bäygene, turizm, sport häm yäşlär eşläre ministrlığı yıl sayın ütkärä. Bıyılğısında, qatnaşuçılar da kübräk bulğan, Qazannıñ üzençäleklären kürsätkän qızıqlıraq marşrutlar täqdim itelgän. Monıñ säbäbe – başqalanıñ 1000 yıllığı. «Qazanğa kiläm dimilär, Qazanğa qaytam dilär», dip cırlıy Xänifä Färxineñ «Böten dönyanı cırında.
2005 yıl turistik şirkätlär öçen, uñışlı çor buldı. Xätta, şirkätlär citäkçeläre, xakimiätlär böten qunaqxanälärne alıp beterde, bez qunaqlarnı qabul itä almıybız, dip belderep kilgän ide. Cäyge aylarda barğan tözeleşlär, yullarnıñ yabılğan buluı da, qunaq yörtüçelärneñ käyefen töşermäde. Qunaqlar kilä tordı, turistik şirkätlär eşli tordı.
Turizm ministrlığı, ütkän yılda Qazanğa küpme keşe kilgän, qaysı töbäklärdän, närsälär qaradı, tögäl mäğlümat birä almıy. Ämma, menä turistik şirkätlär arasında uzdırılğan bäyge, küpmeder fiker yörtergä mömkinlek birä. «Tirizm 21 ğasır» digän bäygedä iñ tanılğan şirkätlär qatnaşa häm alar iñ populär, iñ qızıqlı marşrut, ekskursiäsen täqdim itä.
İnde, 20nçe dekaber kiçendä ciñülär iğlan itelde. Küpmeder näticä yasarğa bula.
Turizm ölkäsendä Qazandağı ğına tügel, respublikanıñ başqa şähärlärendäge qunaq qabul itü oyışmaları aktivraq eşli başlağan. Bäygedä mäsälän, Qazan, Çallı, Alabuğa, Çistay häm Bolğar kebek inde tanılğan turistik üzäklär belän Bögelma, Tübän Kama, Älmät şirkätläre dä üzlären kürsätergä bulğan. Barlığı 88 ğariza kilgän.
Şirkätlärneñ täqdimnärenä qarağanda, haman da çit illärdä yal itüçelär, Tatarstan belän xözurlanırğa kilüçelärgä qarağanda küpkä kübräk. Ämma şul uq waqıtta, eçke turizm yünäleşendä üseş küzätelä. Bigräk tä, jyuri wäkilläre, büläkläw çarasında 1000 yıllıqqa bağışlanğan turlarnı artuına quanıç belderde.
«Milli turizm» yünäleşendä eşlägän şirkätlärne bäygeneñ ayırım nominatsiäsendä yarıştırğannar. Mäsälän, mäçetlär häm möselman ğöref-ğädätläre belän tanıştıruçı «Qazan – möselman qala» digän marşrut ciñüçe dip tanılğan. Şulay uq, ikençe şirkätneñ, Salix Säydäşevnıñ yäşägän, icat itkän urınğa iltüçe «Qızıl-bayraq tatar awılı çaqıra» digän marşrutı ikençe bu yılnıñ iñ yaxşı turları arasında tanılğan. Bäygeneñ başqa yünäleşlärendä dä, tatar tarixına qağılışlı temalar kürenä. Mäsälän, bu «yılnıñ açışı» dip atalırğa layıq tematik ekskursiälär arasına, «Qazan Kremle» muzey-tyulığı täqdim itkän tarixi qıysalar ciñgän. Älege muzeyda eşläwçe belgeçlär, Qazannı 1552 yılda batırlarça saqlaw urınnarı digän ekskursiä täqdim itkän.
Tatarstan buylap iñ uñışlı tematik säfärlär arasında, Bolğarğa säfär tanılğan. Turistik şirkät anı turistlarga «Tamırlarğa qaytu» digän tema astında täqdim itkän. Bolğarnı kürep qaytırğa, çit il turistlarına da täqdim itelgän. Bu ekskursiä çit il turistları öçen iñ yaxşı tur digän nominatsiädä ciñgän.
Şunıñ belän bergä, başqala qunaqlarına «Qazan izge ana ikonası ezlärennän» digän tematik ekskursiä kürsätkännär. «Qazan – Könçığış belän Könbatışnıñ kisekäşkän urını» digän temağa tarixi säfär qılu oyıştırılğan bulğan.
Qazannıñ 1000 yıllığı bäyräme aldınnan tözelgän «Tuğan awılım» etno-mädäni kompleksnı da barlıq turistik şirkätlär yuğarı bäyälägän häm barısı da diärlek, ekskursiälär planına kertkän. Älege kompleks, «Yıl açışı» digän büläk belän bilgelängän.
Bikä Timerova.
