Accessibility links

Кайнар хәбәр

Mäcit Ğafuri icatı bügen dä awazdaş


Tatar häm başqort ädäbiәteneñ klassik yazuçısı- Mäcit Ğafurinıñ tuuına 125 yıl tuluğa bağışlanğan “Millät mäxäbbäte ” isemle ädäbi- muzıkal' kiçä Qazan Tatar yäş tamaşaçılar teatrı binasında uzdı.

Bu ädäbi –muzıkal' kiçäne TR Mädäniät ministrlığı , Tatarstan Yazuçılar berlege häm Qazan tatar yäş tamaşaçılar teatrı berlektä oyıştırğan.

Ädäbi muzıkal' kiçäne Tatarstan Yazuçılar berlege räise İlfaq İbrahimov açıp cibärde. Mäcit Ğafurinıñ şiğerlären häm anıñ tormışınıñ törle mizgellären sänğät'çä Qazan tatar yäş tamaşaçılar artistları äzerläp teatral'läşterelgän tamaşa -küreneş itep alıp bardılar.

Bäyrämgä Başqortstannıñ yazuçılar berlegennän kilgän Rif Toygınov belän Timerğali Dilmöxämmätovlär dä Başqortstanda ağımdağı yılnıñ üktäberendä Prezident Ukazı belän uzdırılğan Mäcit Ğafurinıñ tuuına 125 yıl tuluğa bağışlanğan yubiley kiçäläre zur bäyrämgä äwerelüe turında söyläde.

Ä Qazan däwlät universitetı professorı Xatip Miñnegulov Mäcit Ğafuri turında bolay dide:

“Mäcit Ğafurinıñ icatı bügenge köngä dä awazdaş. Ul tumışı belän tatar, ğömere buyı tatar telendä yazğan. Häm üzen tatar yazuçısı dip xisaplağan. Häm anıñ äsärlärendä - tatar mänfäğәte; “Tatar qızına”, “Tatar yegetenä” häm başqalar. Häm şunıñ belän bergä anıñ icatı çın mäğnäsendä insaniätkä iğtibarlı bulu arqasında başqa xalıqlarğa da, başqortlarğa da üzeneke kebek yoğıntı yasağan. Şunıñ öçen dä anı başqort ğalimnäre dä, başqort uqıtuçıları da, başqort uquçıları da, başqort xalqı da bik yarata.

Tatarstanda M.Ğafurinıñ icatı teoretik häm tekstologik yaqtan öyränep tuplanuı turında Zöfär Rämiev mäğlümat birde.

Tamaşadan soñ bu kiçälärneñ qimmäte turında Rif Toygınov bolay dide : “ Mondıy kiçälärdä bez olı şäxeslärebezne kütärep, bez üzebezne kütäräbez, häm ütkänebezdän ğibrät alırğa tieşbez, xatalar qabatlanmasın. Mäcit Ğafurinıñ icatı, ul- duslıq, berdämlek icatı, küñelneñ yuğarı oçış icatı dip tä äytergä bula”.

İlfaq İbrahimov fikere:

“Mondıy kiçälär yäşlärebez öçen kiräk, bigräk tä. Teatrıbıznıñ 100 yıllığı barğan könnär.Mäcit Ğafurilar, Ğ.Tuqaylar, Fatix Ämirxannar, Ğalimcan İbrahimovlarnıñ buınnarı alar xäzerge zaman ädäbiätebezneñ çişmä başları. Xalqıbız ul waqıtta da añlı bulğan. Mädräsäne kürsättelär. Mädräsäne ul- çın mäğnäsendä yuğarı belem birä torğan mäktäp bulğan. Bez mäktäple xalıq bulğanbız. Çınnan da mädräsä ul üzebezneñ tarixnı, üzebezneñ äxlaqnı kürsätä torğan iman tärbiäli torğan urın bulğan.

Änwär Xucäxmätov fikere “ Mäcit Ğafuri Tatarstanda da Başqortstanda da qäderle şäxes. Bügenge kiçädä TDGPUnıñ bik küp studentları qatnaştılar.Çönki alar da anıñ icatı belän qızıqsınalar , anıñ icatın öyränälär. Häm bu kiçädän bik qänäğät bulıp qaldılar”.

Student- tamaşaçı fikere: “Şundıy matur kiçä buldı , yazuçınıñ icatı belän tanıştıq, ğalimnär çığışları häm teatr artistları uynawları da bik oşadı”. Kiçäneñ ssenariy avtorı Rkail Zäydulla: “Min, tamaşaçılarğa

Mäcit Ğafurinıñ ğömere häm icatınıñ törle aspektların kürsätergä tırıştım. Ssenariynı rejisser Rinat Äyupov säxnäläşterüe belän qänäğätmen”dide ul.

Mälikä Basıyr, Qazan.

XS
SM
MD
LG