Accessibility links

Кайнар хәбәр

Rusiädä xökümättän bäysez oyışmalar qanunı xuplandı


Rusiä Däwlät Duması öçençe häm soñğı uqılışta xökümättän bäysez oyışmalarnıñ eşçänlegenä çikläwlär kertkän qanun ölgesen xupladı. 357 deputat qanunnı yaqlap tawış birde, 20se qarşı çıqtı. Qanun ölgese monnan soñ parlamentnıñ yuğarı palatasına kitä. Rusiädäge xökümättän bäysez oyışmalar, üz eşçänleklären çiklärgä, xattä tuqtatırğa möcbür bulaçaqları turında borçıla. Qanunnı yaqlawçılar – yaña tärtip – terrorğa qarşı köräşne näticäleräk itäçäk, dip sanıy. Rusiä prezidentı Putin qanunğa qayber üzgäreşlär dä täqdim itkän ide. Yevropa Komissiäseneñ Brüsseldäge matbuğat wäkile Emma Udwin, Azatlıq radiosı xäbärçesenä, Yevropa Berlege Rusiädäge xökümättän bäysez oyışmalar belän xezmättäşlegen tuqtatmayaçaq, dip belderde:

"Qanun xuplanğançı aña östälgän qayber üzgäreşlär – döres yünäleş birä. Bez älbättä mondıy qanunnıñ bötenläy bulmawın telär idek, ämma älege üzgäreşlär wazğiätne barıber ciñeläytä. Monnan soñ bez älege qanun qısalarında eşne däwam itäçäkbez."

Uzğan atnada Komissiä, Rusiädä yaña qanun ğämälgä kergäç, Çeçnyağa sosial üseşkä bülengän 20 million yevrolıq programmanıñ ütäleşe şik astında qalaçaq, digän borçılu beldergän ide. Bügen Udwin, programma ğämälgä aşırılaçaq, ämma alğa taba ni bulasın farazlap bulmıy, dide.
XS
SM
MD
LG