Accessibility links

Кайнар хәбәр

Bıyıl Qazannı ike üzäk çırşı bizäyäçäk, ä boz sınnarı bulmayaçaq


Bıyıl Qazanda barlığı 103 çırşı şähärçege bulaçaq. Çırşılarnıñ küpläre inde bizälgän bulsa da, alarnı açu tantanaları düşämbedän başlandı. Tatar bistäsendä häm Petrov parkında älege bäyrämnär düşämbe uzdı. Ä küp çırşılarnı açu tantanası 28 dekabergä bilgelängän. Qazandağı üzäk çırşılar da xalıqnı şul könnän qabul itär dip farazlana. Bu xaqta brifingta jurnalistlarğa Qazan şähäre idäräse citäkçese Eduard İvanov belderde. Başqa yıllardan ayırmalı bularaq, bıyıl Qazannı ike üzäk çırşı bizäyäçäk. Anıñ berse başqala yubileye uñayınnan açılğan Qazannıñ 1000 yıllıq parkında, ä ikençese Yärminkä mäydanında - Üzäk stadion yanında bulaçaq. Qazannıñ 1000 yıllıq parkındağı çırşını tantanalı açu bäyräme 28 dekaber säğät kiçke altığa bilgelängän. Biredä xalıqnı konsert-tamaşalar kötä, ä menä Yärminkä mäydanındağı çırşını räsmi töstä açu qaralmağan. Ul üzeneñ utların şul uq könne qabızaçaq ikän. Äytergä kiräk, yaña urında bulsa da çırşısı iske – 9 yıl buyı “Qazan” milli-mädäni üzäge qarşındağı xalıqnı söyendergän çırşı bulaçaq. Eduard İvanov “Bez anı yañaça eşlädek. Bötenläy başqa törle bulaçaq”, - dip ışandırdı jurnalistlarnı. Million sumnar torğan çırşılarnı yubileylı Qazanğa Mäskäwdän häm başqa şähärlärdän dä täqdim itüçelär baytaq bulğan. Ämma aqçanı küp sarıf itärgä telämägännär. Yaña yıl çaralarına da aqça Qazan xakimiäte qaznasınnan bik az totılğan, bäyräm kübese iğänäçelär xisabına oyıştırıluı äytelde jurnalistlar belän oçraşu barışında.

Bıyıl boz sınnarı da bulmayaçaq. Könnär cılı tordı, xäzer inde citeşmibez dip belderde mädäniät idäräse citäkçese. Anıñ qarawı Yärminkä mäydanı yanındağı çırşı yanında törle attraksionnar oyıştırılaçaq. Qazannan tış respublika rayonnarınnan da qışqı kanikullar waqıtında balalar kilä ala. Çönki çırşı 21 ğinwarğa qädär toraçaq.

Qazannıñ 1000 yıllıq parkında yasalma çırşı 20 metr ozınlıqta bulaçaq. Fontan yanındağı çırşı qırıyında elektron Qış babaynıñ biep toruı küzdä totıla. Eduard İvanov Qış babay iseme iskerep baruın, xäzer şähär balaları telenä Santa-Klaus ütep kerüenä borçılu belderde. Santa-Klaus iseme yazılğan büläklär dä kübräk päyda bula başladı kibet kiştälärendä. Bıyıl büläkne bäyräm könendä ük alu mömkinlege tua. Supermarketlarnıñ kübese täwlek buyı eşläwgä küçte.

Landış Xarrasova.

XS
SM
MD
LG