Sverdlovski ölkäsendä 130 ğа yaqın törle millät wäkilläre yäşi. Ölkä mädäniät ministrlığı, milli oyışmalar citäkçeläre belän bergä yıl sayın millätara çırşı bäyrämnäre oyıştıra. Ğädättä çın artistlar qatnaşında uzdırıla torğan bay eçtäşlekle bu tamaşanı törle millät balaları kötep alalar häm bik teläp qatnaşalar.
Bu könnärdä Yekaterinburg şähäreneñ iñ zur mädäniät saraylarınıñ bersendä şundıy bäyräm bulıp uzdı. Meñnän artıq keşe sıyışlı zur zal näni tamaşaçılar häm alarnıñ äti-äniläre, äbi-babaları belän şığrım tulı buldı. Cıyıluçılarğa Yaña yıl qotlawları tapşıru öçen bäyrämgä Sverdlovski ölkä xökümäte räise urınbasarı, mädäniät ministrı, ölkä duması deputatları, Tatarstan Respublikasınıñ Ural töbägendäge daimi wäkile häm milli oyışmalar citäkçeläre kilgän ide. Sverdlovski ölkäse mädäniät ministrı Natal'ya Vetrova üzeneñ täbrikläw çığışında milli oyışmalar citäkçeläre eşen yuğarı bäyäläp, bergäläp eşläwneñ törle xalıqlarnıñ milli mädäniäten üsterüdä ber-bersen bayıtıp, duslıqnı, tatulıqnı nığıtudağı zur ähämiäten assızıqladı.
Çınlap ta, soñğı yıllarda ölkä xökümäte, mädäniät ministrlığı milli oyışmalar belän bergä eşli başladı. Yaña yılda da bu eş däwam itär digän ışanıç bar. Sverdlovski ölkäse tatarlarınıñ milli tormışın üsterü eşendä iñ berençe başlap yörüçe keşe bulğan, siksänençe yıllarda bu eşneñ awırlığın üz cilkäsendä tatığan, çinovniklarnıñ ğına tügel, küp kenä urında eşläwçe millättäşlärebezneñ bitaraflığın toyıp yöräge ärnegän, millät öçen can atıp yörüçe Söfxät ağa Nadıyrov belän bu turıda äñgämä qorıp aldıq. Söfxät ağa inde yegerme biş yıl Mäcit Ğafuri isemendäge tatar-başqort cämğiäten citäkli. Süz uñayınnan şunı da äytep kitäse kilä, Söfxät ağa Nadıyrov Mäcit Ğafuri isemendäge premiäneñ berençe lawreatları isemlegenä kergän öç keşeneñ berse. Söfxät ağa söyläwençä, xakimiät wäkilläre, çınlap ta, milli oyışmalar ixtıyaclarına qolaq sala başladılar. Aldağı yılda Musa Cälilneñ tuuına 100 yıl tulu datası bilgeläp üteläçäk. Äzerläw çaralarında Sverdlovski ölkäse xökümäte häm mädäniät ministrlığı aktiv qatnaşa. Şulay uq ğabdulla Tuqaynıñ tuuına 120 yıl tulu datasın da yaxşılap bilgeläp ütä alırbız dip ışanası kilä, dide Söfxät ağa.
Yaña yılğa nindi teläklär belän keräsez, digän sorawğa başqort milli üzäge citäkçese Fäymä Yosıpova Yekaterinburg şähäreneñ 21нче mäktäbe nigezendä başqort telen uqıtu buyınça klass açu eşen başlap cibärü buyınça äzerlek eşläre turında söyläde häm yaña yılda, nihayät, andıy klass açılıp eşli başlayaçağında ömet bar ikänen äytte.
Başqa milli oyışmalar citäkçeläre dä Yaña yılğa zur ömetlär, zur plannar belän kerülären belderdelär. Sverdlovski ölkäse nemeslarınıñ milli-mädäni avtonomiäse citäkçese, deputat Aleksandr Buxgamer barısınıñ da teläklären ber süz belän: “Bergä bulsaq, köçle dä, bay da bulırbız. Yaña yılda ber-berebezne xörmät itep yäşik!” – dide.
Zur zalda matur itep bizälgän çırşı tiräsendä äylän-bäylän uynawçı, törle milli kiemnär kigän erele-waqlı balalarğa qarap, mondıy urtaq bäyrämnärneñ nindi zur ähämiätkä iä buluın añlıysıñ. Sverdlovski ölkäsendä qolaç cäygän tolerantlıq üsterü programması ütäleşeneñ ber misalı bulıp tordı bu bäyräm.
Fäwiä Safiullina
Yekaterinburg.
