Mäskäw. Rusiä prezidentı Vladimir Putin Ukrainağa gaznı bazar bäyälärenä sata başlaw teläge säbäple kilep tuğan kierenkelektä soñğı mizgeldä genä yaña täqdim belän çıqtı. Televideniä aşa kürsätelgän oçraşu barışında Putin Rusiäneñ "Gazprom" şirkätenä kiläse öç ayda gaznı Ukrainağa elekke bäyälärgä satu kürsätmäsen birde, ämma ber şart quydı - aprildän başlap inde Kiev gaznı bazar bäyälärenä satıp alırğa häm moña rizalığın bügen birergä tieş bulaçaq. "Gazprom" elegräk, ägär dä Kiev belän yaña kileşü imzalanmasa, ğinwarnıñ 1-endä Mäskäw waqıtı belän säğät irtänge 10-da Ukrainağa gaz birüen tuqtatu belän yanağan ide. Rusiä yağı, xäzer meñ kubometr gaz öçen 50 dollar tülägän Ukrainanıñ yaña yıldan başlap şul uq külämgä 230 dollar tüläwen teli. Kiev isä gaz öçen bazar bäyäläre kertü kiräklegen tanıy, ämma bäyäne kütärü salmaq bulırğa tieş dip belderä.
