Accessibility links

Кайнар хәбәр

İminlek Şurası Kosovo mäsäläsen xäl itä almadı


Bu bülmädä dönya mäsäläläre xäl itelä... yä itelmi.
Bu bülmädä dönya mäsäläläre xäl itelä... yä itelmi.

Çärşämbedä Berläşkän Millätlär oyışmasınıñ İminlek Şurasında ütkän tıñlawlar Kosovo mäsäläsenä yänä açıqlıq kertä almadı. Qarşı taraflar härberse üzenekendä qaldı. Kosovo wäkilläre yaqın arada bäysezlek iğlan itäçägen qabatladı. Serbiä citäkçeläre bu bäysezlekne tanımayaçağın belderde.


Berläşkän Millätlärneñ İminlek Şurası mönbärennän Serbiä prezidentı Boris Tadiç äğza illärne Kosovonıñ beryaqlı iğlan iteläçäk bäysezlegen tanımasqa öndäde. Tarixtan misallar kiterep yasağan yalqınlı çığışında ul bu adım Balkandağı torıqlılıqnı qaqşataçaq, başqa seperatist töbäklärgä ürnäk bulaçaq, dip kisätte. Tadiç 4 atna elek Serbiä premier-ministrı Voytslav Koştuitsa näq şuşı mönbärdän ätkän süzlärne qabatladı:
Boris Tadiç: Serbiä Kosovonı tanımayaçaq.

"Serbiä Kosovonıñ bäysezlegen berqayçan da tanımayaçaq, häm bar demokratik wä diplomatik çaralar belän üzeneñ bötenlegen häm möstäqillegen saqlap qalaçaq. Monıñ belän qabat şunı raslıym: Serbiä köç qullanırğa yä suğışqa barmayaçaq" dide Serbiä prezidentı.

Kosovo albannarı citäkçese Häşim Taçiğa räsmi belderü yasaw mömkinlege birelmäde. Berläşkän Millätlär oyışmasında andıy mömkinlek räsmi tanılğan däwlät wäkillärenä genä birelä. Tıñlawlar betkäç jurnalistlar aldına çığıp, Häşim Taçi bolay dide:

Häşim Taçi: Bäysezlekne yaqın arada iğlan itäçäkbez.
"Yaqın arada bez qarar qılaçaqbız häm xalıqara cämäğätçelek bezne tanır dip ömetlänäbez. Bez här närsäne Waşington, Brussel häm başqa illär belän kileşep başaqaraçaqbız" dide Kosovo albannarı citäkçese.

Waşington Kosovoğa bäysezlek birü yağında. Tıñlawda çığış yasağan Quşma Ştatlar wäkile Zalmay Xälilzad bäysezlek birüne küzdä totqan Marti Ahtisaari planın iñ döres çişeleş dip atadı.

Rusiä wäkile Vitaliy Çurkin Xäilzad fikerenä qarşı çıqtı, Kosovoğa bäysezlek birüneñ ber qanuni niegeze dä yuq dide:

"Ber yaqlı adım yasasa da, Kosovo xalıqara cämäğätçelek tarafınnan tulısınça tanılmayaçaq. Kemder, qararnı bozıp, bälki tanır da, tik ul barıber bu binağa tulı xoquqlı äğza bularaq kerä almayaçaq" dide Rusiä wäkile.

Çurkin telgä alğan İminlek Şirası 1999 yılda qabul itkän 1244 sanlı qararda Serbineñ bötenlege qağılğısız, digän süzlär bar. Ul qararnı 5 daimi äğza, şul isäptän Quşma Ştatlar da xuplağan ide. Läkin xäzer Könbatış Kosovonıñ bäysezlege töbäktäge çınbarlıqnı töğäläk çağıldıraçaq digän qaraşata.

Bu yäkşämbedä Serbiädä ütäçäk prezident saylawlarında da Kosovo mäsäläse töp urın alıp tora. Xäzerge prezident Boris Tadiç belän radikal säyäsätçe Tomislav Nikoliç arasında qızu köräş bulaçaq dip kötelä. Soñğı fiker beleşügä qarağanda, Nikoliç berniçä protsentqa alğa çıqqan. Belgeçlär monı näq menä Kosovo tiräsendäge kierenkelek belän añlata. Kosovo beryaqlı bäysezlek iğlan itügä taba awışqan sayın, Serbiädä moña yul quyılmayaçaq, digän radikal käyeflär köçäyä.

XS
SM
MD
LG