Иран киңкүләм хәбәр агентлыклары атом технологияләре өлкәсендә эшләүче галим Тәһран урамы буйлап машинада барганда аңа мотоцикллы ике кешенең һөҗүм итүен белдерә. Алар машинага магнитлы бомба ябыштырып тиз генә китеп барган. Берничә секундтан бомба шартлап галим Мостафа Әхмәдирушанны үтергән, аның белән машинада булган ике кешене яралаган.
Мостафа Әхмәдирушан
Фарс хәбәр агентлыгы белдерүенчә, 32 яшьлек галим Иранның Исфаһан шәһәре янындагы Натанц атом корылмасында уран баету бүлеген җитәкләгән булган.
Тәһран шәһәр башлыгы урынбасары Сәфәргали Баратлу бу һөҗүм өчен Израилне гаепләде. Ул журналистларга “бу элек башка галимнәрне үтерүдә кулланылган кебек үк магнитлы бомба булган һәм бу сионистлар эше", диде.
Иран еш кына Израил белән Кушма Штатларны Тәһранның атом эшчәнлеген зәгыйфьләндерү өчен аның атом галимнәрен үтерүдә гаепләп килә. Әмма бу илләр әлеге гаепләүне кире кага.
Бу үтерүләр Тәһран БМО таләпләренә буйсынмыйча уран баету эшчәнлеген дәвам иткәндә халыкара киеренкелек арта барган чорга туры килә. БМО Тәһран баетылган уранны атом коралы ясауда кулланырга мөмкин дип борчыла.
Бу атнада БМОның Халыкара атом энергия идарәсе Иран үзенең Ком шәһәре янында, күптән түгел генә мәгълүм булган яшерен Фордоу корылмасында уранны 20 процентка кадәр баету эшенә керешкән дип белдерде.
20 процентка кадәр баету атом ягулыгы өчен зарур дүрт проценттан инде шактый югары. Шул ук вакытта атом коралы өчен зарур 90 процентлы баетудан бик нык түбән.
Кушма Штатлар һәм аның беректәшләре Иран үзенең атом програмын атом коралы ясау өчен куллана дип шикләнә. Шул сәбәпле күптән түгел АКШ һәм Европа берлеге Иранга карата өстәмә чикләүләр кертте.
Тәһран исә үз атом програмының бары тик тыныч максатта гына эшләвен белдерә.
9 гыйнварда Иранның югары рухи җитәкчесе аятула Али Хаменеи, Көнбатышның яңа чикләүләре Тәһранның атом эшчәнлегендәге юнәлешенә тәэсир итмәячәк, диде.
