"Үлем төркемнәре" Русиядә 2016 елда үз-үзләренә кул салучыларның 60лап процентка артуына төп сәбәпләрнең берсе, дип белдерде Русиядә бала хокуклары вәкиле Анна Кузнецова.
"2011 елдан 2015 елга кадәр илдә үз-үзләренә кул салучылар саны тотрыклы рәвештә елына 10 процентка кимеп барды. Әмма 2016 елда 57 процент үсеш күзәтелә. Без кинәт кенә биш елга артка чигендек. Биредә төп сәбәпләрнең берсе – социаль челтәрләрдә "үлем төркемнәре"нең таралуы", диде Кузнецова "Балигъ булмаганнар арасында суицидларны булдырмау турында"гы киңәшмәсе барышында.
Кузнецова проблемны хәл итү өчен кануннарны камилләштерергә һәм психолог кебек белгечләр ярдәмен алу мөмкинлеген булдырырга кирәк, дип белдерә.
