Accessibility links

шимбә, 3 декабрь 2016, Казан вакыты 07:38

Stärletamaq pensionerları qarşılıq çarası oyıştırdı


Başqortstannıñ Stärletamaq şähärendä ölkän yäştäge keşelär häm pensionerlar atnakiç könne qarşılıq çarasın ütkärde. Ufadan qala respublikada zurlığı buyınça ikençe urında torğan şuşı zur şähär moñarçı gel ürnäk itep quyıla ide. Anıñ xakimiät başlığı Spartak Äxmätovnı da respublika citäkçeläre gel xörmätläp kenä tordı. Şuña kürä dä bu şähärdä qarşılıq çarası ütkärelüe häm uramnarğa berniçä yöz keşeneñ çığuı kötelmägän xäl buldı, älbättä. Uram cıyınında qatnaşuçılarnıñ barısı da Stärletamaq şähäre xakimiäte binası aldına cıyıldı. Alarnıñ taläpläre küp çığışlarda yañğıraş taptı. Pensionerlarnıñ häm ölkän yäştäge keşelärneñ toraq-kommunal' xezmätlärgä bäyälärneñ üsüe häm elektr transportında yörü öçen yaña yıldan aylıq xaqlarnıñ artuı açuın kitergän ikän.

Şaqtıy şawlıy başlağan xalıq yanına Stärletamaq şähäre xakimiäte başlığı Spartak Äxmätov häm anıñ urınbasarları çıqtı. Alar uram cıyının oyıştıruçılarnıñ taläplären tıñlap torğannan soñ, üz añlatmaların birergä tırıştı. Şulay da mitingta qatnaşuçılarnı türälärneñ añlatmaları ışandırıp betmäde buğay, cıyın azağında alar barıber üz rizasızlıqların belderep, il citäkçelärenä möräcäğät itäçäklären belderde. Älege qarşılıq çarası xaqında respublika matbuğatı läm-mim.

Stärletamaq şähärendä ütkän uram cıyını bıyıl Başqortstanda ikençe qarşılıq çarası buldı. Elegräk tä xäbär itelüençä, 9 ğinwar könne şundıy uq çara Ufada Pensiä fondı binası aldında oyıştırılğan ide. Ul cıyın xaqında da respublikanıñ räsmi matbuğat çaraları kiñ cäyelep söylämäwne xup kürgän ide.

Fänis Fätxi, Ufa

XS
SM
MD
LG