Accessibility links

пәнҗешәмбе, 8 декабрь 2016, Казан вакыты 01:22

Tatarstan jurnalistları Putinnan ni soramaqçı bulğan?


Rusiädä säyäsät belän qızıqsınıp baruçılar sişämbedä köne buyı Putinnıñ jurnalistlar belän oçraşuın tikşerdelär. Tatarstannan da bu oçraşuğa tuğız jurnalist bardı. Yıl sayın baralar anısı. Bıltır da, ber tatarstanlı jurnalistı soraw birgän ide. Bıyıl da beräwgä soraw birü bäxete tätede. Rusiä prezidentınıñ jurnalistlar belän oçraşuına ni pıçağım bu qädär iğtibar birelä soñ dip aptırarğa kiräkmi. Bu matur ber säyäsi texnologiä. Tatarstannan tuğız jurnalist qatnaştı didek. Alar arasında, “İntertat, tatar- inform, Tatarstan, Yaña Ğasır tele kanalları, Watanım Tatarstan, Respublika Tatarstan ” gäzitläre baş möxärrirläre yäki jurnalistları qatnaştı.

Respublikadan tuğız jurnalist qatnaşsa da, barı tik berse genä şulay itep soraw birälde. Ä Tatarstanda eşläwçe, Putin belän oçraşuğa çaqırılmağan başqa jurnalistlar da bit bua buarlıq. Azatlıqnıñ sişämbedäge Açıq mikrofon säxifäse şul xaqta. Tatarstandağı Putin oçraşuında bulmağan jurnalistlar Rusiä ilbaşına nindi sorawlar birerlär ide.

“Möslimä” ictimaği oyışması räise, Möselman jurnalistları berlege, Rossiädä “İslam mirası” oyışmasınıñ prezidium äğzası Älmirä Ädiätullina:

-Bügen iñ citdi mäs'älä Rossiädä din ara häm millät ara duslıqnı qaqşatmıyça däwam itü. Bezneñ däwlät şurası maxsus möräcäğät qabul itte alarğa. Menä şuşı möräcäğätne barlıq citäkçelärneñ üzäklärenä ütärlek itep añlatırğa kiräk!?

Böten dönyağa taraluçı “Tatar radiosı”nıñ general' direktorı - Almaz Tahir ulı Mirğayazov :

- Älbättä min byudjet sferasında eşläwçe keşe tügel. Läkin şuña da qaramastan mine xalıqnıñ yäşäyeşen tä'min itüçe keşelärneñ yäşäyeş däräcäsen kütärü öçen nindiräk eşlär eşlänä ikän?! Ä inde bolay şäxsän sorawlarnı Putinğa tügel, ä başqa keşelärgä birer idem. Rossiä prezidentına cämğiätne, däwlätne sälämätländerü häm niçä yıllar buyı däwam itkän krizis şartlarınnan çığu yulların bar mikän. Nindi çaralar kürelä ?!

“Mädäni comğa” atnalıq-ictimaği gazetasınıñ baş möxärrire, şağir - Zinnur Mansurov:

- Rossiä elek-elektän küp millätle il bulıp sanala, ämma läkin küp millätle buluğa qaramastan şuşı ildä bügenge köngä qädär milli säyäsät konsepsiäse eşlänmägän. Min inde bu eş üzgärtep qoru çorında, demokratiälätü waqıtında eşläner dip uylağan idem…Ämma älegä qädär mondıy konsepsiä yuq. Sez bu mä’sälägä niçek qarıysız?

“Cir sulışı” gazetasınıñ baş möxärrire – Firdüs Gıymaltdinov:

- Xörmätle Vladimir Vladimiroviç, sez soñğı yıllarda Rossiädäge awıl xalqınıñ 25,2 millionı xäyerçelekneñ arğı yağında yäşägänen beläsezme? Däwlät statistqa komitetı mäğlümatları buyınça bu barlıq awıl keşeläreneñ 66% tı digän süz. Alarnıñ xällären yaxşırtır öçen närsä eşlärgä cıyınasız?

“Quray” radiosı di-djee, “Aqçarlaq” gazetasınıñ jurnalistı – Gabderäxim:

- Putinğa ike soraw birer idem. Berençese, ni öçen xökemät gazetalarnı-jurnallarnı ayıra? Qayber gazeta-jurnallarğa aqça tüläp tora, ä qalğannarına bötenläy tülämi… Beterergä ide bu xällärne. Mäsälän “Tatarstan” jurnalına fälän xätle million tülilär, pıçağım da uqırlıq äyber yuq. Tatarçası turında süz bara, rusçasında äle uqırlıq yazmalar taptım diärgä bula. İkençese, pensionerlarnı şunıñ qädär mäsxärä itälär. Menä minem jurnalist bularaq 2000 pensiägä yäşäp qarıysım kilä. Annan soñ taza ber biznesmennı yäşätäse ide. Bu bit inde mısqıl itü, keşe ğömer buyı eşlägän ikän aña tülärgä kiräk. Hiç yuğı alıyq inde 10 meñ. Räxätlänep yäşäp qalsınnar, kübese ülep yaqtı dönyanıñ räxäten dä kürmi kitä bit. Tege dönyada alar cännätkä elägäme ällä tämuğqamı, ansı da bilgesez.

“Sabantuy” balalar gazetası jurnalistı Räzinä İsmägıylova:

- Balalar matbuğatı üz könen üze küralmıy. Aña reklama birüçelär dä tiraj bulmağaç suğılmıyça ütälär. Şuña kürä finans mä’säläsen kütärep bulmıymı balalar matbuğatınıñ?

Röstäm İsxaqi, Räfis Cämdixan

XS
SM
MD
LG