Accessibility links

җомга, 9 декабрь 2016, Казан вакыты 18:26

Ramil Bignov Mäskäwgä eş säfärenä kitte


Başqortstan Tatar milli-mädäni moxtariäte räise, Başqortstan Berläşkän oppozitsiäse koordinatsiä şurası räise Ramil Bignov Mäskäwgä eş säfärenä kitte. Anda ul Ufada üze tözelüçe tatar gimnaziäse tiräsendäge dawğa säbäple çaqırıp alındı. İnde xäbär itelüençä, Ufada tatar cämäğät eşleklese häm eşquar Ramil Bignov tatar gimnaziäse urnaşaçaq binanı tözetä ide. Ämma Ufa şähäre xakimiätläre bu bina tieşle röxsätsez tözelä, dip anı cimerergä digän qarar çığardı. Monı tatar milli oyışmaları wäkilläre respublikada tatarlarğa qarşı basımnıñ ber çağılışı dip qabul itte häm anıñ belän kileşmäwen belderde.

İnde öç qatı tözelep betkän binanı sud pristavları häm militsiä ozatuında kilgän maxsus cimerü brigadası cimerergä dä kereşkän ide. Ämma, respublika tatar cämäğätçelege qarşılığı arqasında, ul eş älegä tormışqa aşırılmadı. Bu ğämäl xaqındağı xäbärlär häm tatar oyışmalarınıñ piketlar oyıştıruı turındağı federal'' üzäk taraflarına da barıp ireşte häm Mäskäwdän, bu gimnaziä tiräsendäge cäncalnı centekle tikşerep betkänçe, anı cimerüne tuqtatırğa boyırıq alındı. Xäzer anda tınlıq, gimnaziä binası yanınnan barlıq cimerüçe texnika alıp kitelde.

Zur şaw-şu quptarğan älege mäs''älä belän Mäskäw türäläre dä qızıqsınğanı mäğlüm bulğaç, Başqortstan xakimiätläre üz niätlärennän qayttı. Şunnan soñ tizdän Başqortstan Tatar milli-mädäni moxtariäte räise Ramil Bignov Mäskäwdän çaqıru aldı häm atnakiç könne anda kitte. Comğa könne Rusiäneñ baş sud pristavı häm başqa yuğarı citäkçelär belän oçraşularda qatnaşaçağı mäğlüm anıñ. Älege mälgä bu söyläşülärneñ näticäse bilgele tügel ide.

Niçek kenä bulsa da, Başqortstan tatar milli oyışmaları Ufadağı tatar gimnaziäsen cimertü eşlären tuqtatuğa ireşte häm alar bu köräştä artqa çigenmäyäçägen belderä.

XS
SM
MD
LG