Başqortstan Prezidentı Mortaza Räximov soñğı könnärdä respublika rayonnarın gizä. Ul Balaqatay, Qıyğı, Täteşle häm Baltaç rayonnarında bulıp qayttı. Säfäreneñ maqsatı - uñış cıyu barışı belän tanışu, yaña qorılmalar açu. Prezident Qıyğı rayonındağı Qolbäk awılında mäktäp açuda, Täteşle rayonındağı Yalğız Narat awılında sport zalı, Ğäräbäş awılında mädäni üzäk açuda qatnaştı. Mortaza Räximov säfäre barışında Neftekama şähärendä başqort gimnaziäsen safqa kertügä dä üzeneñ xäyer-fatixasın birde. Ul älege tantanalarda çığış yasap, Başqortstan Rusiädä mäktäplär tözü buyınça berençe urında bara dip bilgeläde. Anıñ süzlärenä qarağanda, respublikada yıl sayın 40-45 mäktäp tözekländerelep häm tözelep işeklären aça.
