Başqortstanda yäşäp icat itüçe tanılğan tatar şağire Rädif Timerşinğa 60 yäş tuldı. Şulay itep yaña ğına ayaq basqan 2007 yıl başında üzeneñ tügäräk tuğan köne mäşäqätläre belän mäşgul'' ul. Üzeneñ şuşı kürkäm yubileyına Rädif Timerşin yaxşı büläk tä aldı. Başqortstan “Kitap” näşriätında anıñ çirattağı kitabı dönya kürde. Avtornıñ tatar telendä çıqqan “Ğaläm häm adäm” dip isemlängän bu kitabına elegräk häm soñğı yıllarda yazılğan poemaları, balladaları, fälsäfi-lirik häm kölkele şiğerläre, mäsälläre, äkiätläre kergän.
Rädif Timerşin “Kitap” däwlät näşriätında tatar telendä basılğan çirattağı cıyentıgın üzenä çınlap ta zur büläk dip sanıy. 2 meñ danädä aqça tülämiçä kitap çığara alu bügenge köndä siräk küreneş şul.
Rädif Timerşin Yañawıl rayonındağı Mäsäğut isemle tatar awılında tuıp üsä. Başqortstan däwlät universitetınıñ tatar filologiäse bülegen tämamlıy. Distädän artıq kitabı çıqtı anıñ. Bügenge köndä R.Timerşin Ufada tatar telendä çığuçı “Qızıl tañ” gazetasında eşli. Ädäbiät häm sänğät bülegen citäkläwçe şağir häm jurnalist respublikadağı tatar ädipläreneñ icatın kiñ cämäğätçelekkä citkerügä küp köç sala.
Yubileyı uñayınnan bez dä Rädif ağanı qotlap, anıñ 60 yäşen nindi käyeflär belän qarşı alğanlığın beleştek häm üzeneñ soñğı waqıtta yazğan ber şiğıren uquın soradıq.
Başqortstanda yäşäp icat itüçe tanılğan tatar şağire Rädif Timerşin 60 yäşlek yubileyın bilgeli ul bu könnärdä. Äle Ufada häm tuğan yağı Yañawıl rayonında anıñ icat kiçälärenä äzerlek bara.
