Başqortstan mäktäplärendä dä comğa könne küplär öçen soñğı qıñğıraw yañğıradı. Bıyıl respublikada 42 meñ bala 11 nçe sıynıfnı häm 51 meñ bala 9 nçı sıynıfnı tämamladı. Şuşı uñaydan barlıq mäktäplärdä dä bäyräm tantanaları oyıştırıldı. Mäğärif ministrı Zinnät Allayarov isä barlıq uquçılarnı häm alarnıñ uqıtuçıların çirattağı uqu yılı tämamlanu häm çığarılış sıynıf balalarınıñ zur tormış yulına ayaq basuı belän qotladı.
Bıyıl da Başqortstanda Berdäm däwlät imtixanı sisteması qullanılaçaq. Şunıñ belän berrättän tağın ber yaña alımnı kertergä qarar ittelär. Anısı här töbäktä munitsipal' däräcädäge tikşerü nigezendä tormışqa aşırılaçaq. Şul xaqta bügenge tantanalar barışında Başqortstan mäğärif ministrlığınıñ ğomum belem birü mäktäpläre bülege mödire Räşidä Küsäbäyeva mäğlümat birde.
