Başqortstannıñ Çaqmağış rayonındağı danlıqlı tatar awılı Ablayda tanılğan tatar cırçısı Vener Mostafinğa häykäl açıldı. Şuşı tantanağa Ufadan da tatar zıyalıları, milli xäräkät citäkçeläre häm aktiv äğzaları bardı.
Başqortstanda yäşäp icat itkän talantlı tatar cırçılarınıñ berse Vener Mostafin, öç yıl çaması elek, üze ozaq yıllar eşlägän filarmoniä binasınıñ ber bülmäsendä pianinoğa asılınıp ülgän kileş tabılğan ide. Üleme aldınnan yazu qaldırmağan bulsa da, tuğannarı häm cämäğäte Wäsilä xanım anıñ respublika xakimiätläre häm mädäniät ölkäse citäkçeläre tarafınnan ezärleklänüläre xaqında söyläde. 2003 yılda, Başqortstan prezidentın saylawlar waqıtında, Vener Mostafin Mortaza Räximovqa köndäş kandidat bulğan Ralif Safinğa teläktäşlek beldergän bulğan. Menä şunnan soñ Vener Mostafinnıñ icatına da, üzenä dä köçle basım yasalğan. Başqortstan prokuraturası tanılğan cırçını ülemgä kiterep citkerü oçrağı digän maddägä nigezlänep cinayät eşe dä açıp qarağan ide, ämma ul eşne ozaqlamıy yaptılar.
Kürenekle cırçını üzeneñ tuğan yağına Çaqmağış rayonınıñ Ablay awılına alıp qaytıp mäñgelek yortına küçergännär ide. Menä Ufadan barğan wäkillär belän bergäläp, Vener Mostafinnıñ tuğannarı, dusları 24 may könne anıñ häykälen açu tantanasında da qatnaştı. Ufadan bu wäkillekkä Bötendönya Tatar kongressınıñ Başqortstandağı daimi wäkile Alik Lokmanov citäkçelek itte.
Fänis Fätxi, Ufa
