Tokyoda çığış yasap Äl-Baraday Ğiraq tapşırğan dokumentlarnıñ döres bulu-bulmawın tikşerü öçen qoral inspektorlarına kübräk waqıt birü kiräk dide. Tikşerülär öçen waqıt kiräk. Tikşerü ul täñkä çöyep äyye bu döres yäki buq bu döres tugel dip kenä äytü tügel, dide Äl-Baraday.
Düşämbe könne BMO qoral tikşerüçeläre Bağdadtan könyaqta urnaşqan Ät-Tuayda atom qorılmasına 3-nçe märtäbä kilep tikşerülärne däwam itte. İkençe ber törkem Bağdadnıñ tönyağında ber urınnı tikşerde dip xäbär itelä.
Ğiraqnıñ küpläp üterü qoralları programması bulu-bulmawın tikşerü öçen yäkşämbedä biregä tağın 25 tikşerüçe kiterelde.
Yäkşämbedä Ğiraq cibärgän dokumentlar New-Yorktağı BMO idaräsenä häm Vienadağı Xalıqara Atom energetikası agentlığına kilep citte. Ğäräp telen belüçe tärcemäçelär şunda uq alarnı tärcemä itügä kereşte. BMO räsmiläre bu dokumentlarnıñ berniçä küçermä nösxäsen yasap BMO iminlek şurasında daimi äğza bulğan Britaniä, Qıtay, Fransiä, Russiä häm Quşma Ştatlarğa tapşırırğa buldı. Baraday 10 kön eçendä BMO iminlek şurası öçen bu dokumentlarğa küzätü yasiaçaq dip xäbär itelä.
