Pänceşämbe könne Tatarstannıñ Sanitariä häm epidemiologiä däwlät küzätüe xezmäte Qazanda tülämä çire oçrağın rasladı. Älege cäncalnıñ tarixı monnan ike atna çaması elek Yäşel Üzän rayonınıñ Kügäy awılında başlana. Awılnıñ ber keşese suğımğa tana çala häm ite belän tuğan tumaçaların sıylıy häm küçtänäç itep öläşä. Küçtänäç it Qazanda yäşäwçe apağa da birep cibärelä. Öygä qaytqaç küçtänäç ittän peşkän şulpanı aşağannan soñ xanımnıñ qulında cäräxät xasil bula. Başta ul yäşäw urınındağı xastaxanädä genä däwalana. Noyäber azağında ğına aña maxsüs xastaxanädä tülämä çire şige barlığın äytälär. Şunnan soñ Kügäydäge tana itendä tülämä çire tabıla. Ul arada tülämäle itneñ ber niçä rayonğa häm yözgä yaqın keşegä taratılğanı bilgele bula. Tatarstanda tülämä çire taralğan digän xäbärlär Rusiä matbuğat çaralarında yañğıradı. Läkin Tatarstanda belälär çirle xaywannar başqa yuq. Bäxetkä qarşı çir iärtüçedä beräw genä. Räsmi xäbärlärdä tülämä çireneñ taralmawına barlıq çaralarda kürelde tülämäle itne qulına alğan yä aşağan ber yöz çaması keşe isäpkä häm küzätügä alınğan.
Pänceşämbe kön küñelsez faciğäle xäbärlärne işle alıp kilde. Respublika klinik xastaxanäseneñ Almaniädä däwalanuçı elekke baş tabibı Räzin Fatıyxovnıñ yöräge tuqtağan. Aña küptän tügel genä 50 yäş tulğan ide. Apas yulında İtar-TASS fotokorrespondentı Mixail Medvedev üze yörtkän avtomobilendä yul häläkätenä eläkkän. Üze awır xäldä reanimatsiädä, ä yanında utırıp barğan xatını jurnalist Marina Medvedeva häläk bulğan.
Saylaw aldı wäzğiäte dä Başqortstanda da, Tatarstanda da kiskenläşüe xättä faciğäle tösmerlärgä kerüe turında xäbärlär yöri. Başqortstanda tatar mänfäğätläreneñ faciğäle xälgä kerüenä Tatarstan citäkçelege dä borçu belderde. Azatlıq radiosınıñ Mintimer Şäymievneñ Başqortstandağı saylaw aldı kompaniäsenä qarata äytkän fikerläre turında söylägän tapşıruına qızıqsınu belderüçelär küp. İnde xäbär itkänebezçä Mintimer Şäymiev- millionnan artıq tatar yäşi torğan Başqortstan Respublikası Prezidentı wazifasına ber genä nämzättä tä Başqortstanda tatar tele statusı turındağı mäs’äläne çitlätep uza almıy, bu töp soraw häm bez aña cawapnı işetergä tieş dip sanıy.
Yunıs Ätnäle
