Accessibility links

сишәмбе, 6 декабрь 2016, Казан вакыты 19:10

Qazannan ber törkem tatarstanlılar Xacğa kitte


Düşämbe, 12nçe ğinwar könne Qazannan Xac säfärenä 29 keşelek törkem çığıp kitte. Alar Mäkkägä qädär yulnı avtobuslarda ütäçäk. Oyıştıruçılar süzlärenä qarağanda, avtobus säfäre şaqtıy qıyın häm awır. Ul 8-9 köngä suzılır, dip kötelä. Tögäl genä yulda ütäçäk waqıtnı äytäse qıyın, çönki berniçä il, tamojnyalar aşa uzası bar, ozın yulnıñ törle mäşäqätläre dä kilep çığarğa mömkin. Şuña da qaramastan, avtobusta säyäxätne olı yäştäge keşelär xup kürälär. Ni disäñ dä, älege säfärneñ bäyäse dä arzanraq, qışqı salqınnan Ğäräbstandağı cäyge esse hawa şartlarına küçü dä äkrenläp kenä bara. Menä bıyıl da 25 xacçı arasınnan küpçelekne 60 yäştän östägelär täşkil itä. Awır yuldan qurıqmıyça izge ğämälne qılırğa niät itkän 75 yäşlek ike xaci da tabılğan. Xacğa baruçılardan toruçı avtobus aldan Ästerxan şähärenä yul totaçaq, ä annarı yulçılar 5 il – Äzerbäycan, İran, Siriä, İordaniä, Törkiä aşa ütep, Ğäräbstanğa barıp citärgä tieş. Kilep citkäç, yulçılar 8-10 kön däwamında Mädinä şähärendä toraçaq. Xäzer şuşı säfär turında Diniä Näzaräteneñ Xac bülege xezmätkäre Aygöl Fäyzieva söyli.

Bıyıl avtobusta barı tik ber genä törkem kitte. Bıltır bez ike avtobus cibärgän idek. Läkin bıyıl oçqıçta baruçılar kübräk. Avtobus törkemendä barlığı 29 keşe, şularnıñ 25 – xacilar, ike avtobus yörtüçe. Şulay uq baruçılar arasında törkemneñ citäkçese häm tabip da bar. Yul bik ozın häm awır, keşelärgä meditsina yärdäme kiräk bulırğa mömkin. Mädinägä kilep citkäç, xacilar yal itäçäklär, hawa şartlarına iäläşäçäklär, Xac qılırğa äzerlänäçäklär

Şulay itep, düşämbe könne ber törkem Xac qılırğa niätlänüçelär Qazannan Soğud Ğäräbstanına yul tottılar. Ä ikençe törkem – Xacğa oçqıçta baruçı tatarstanlılar isä, yulğa 21nçe ğinwar könne çığaçaq. 150 möselman kiçke säğät 10da Qazan aeroportınnan Üzbäk hawa yulları kompaniäseneñ oçqıçında Taşkent şähärenä oçaçaq. Anda başqa xacılar belän bergä alar Djidda şähärenä yul totaçaqlar. Avtobusta säfär qıluçılardan ayırmalı bularaq, alarnıñ säfäre ber kön genä täşkil itäçäk. Kire Qazanğa alar 11nçe fevral könne äylänep qaytırğa niätlilär.



Gölnaz İlgizär

XS
SM
MD
LG