Comğa kön irtän Başqortstannıñ zur ğına törkem eşquarları Berläşkän Ğäräp ämirleklärenä kitte. 15 keşedän torğan bu wäkillek anda Dubay şähärendä ber ay buyı baraçaq Bötendönya säwdä bäyrämendä qatnaşaçaq. İñ qızığı şul – älege wäkillek tulısınça diärlek xatın – qız eşquarlardan tora. Alarnıñ qayberläre «Xatın – qız – yıl direktorı» digän häm başqa bäygelärdä ciñep çıqqan buldıqlı xanımnar häm tutaşlar. Ber atnağa suzılaçaq bu säfärläre barışında Başqortstan xatın – qız eşquarları bik küp çaralarda qatnaşaçaq ikän. Dubaydağı iskitkeç zur kürgäzmä belän tanışu, Berläşkän Ğäräp ämirlekläreneñ İqtisad ministrlığında häm ilneñ Säwdä – sänağät palatında törle oçraşularda qatnaşu, keçe häm urta eşquarlıq ölkäsendä elemtälär buldıru qaralğan anda. Älbättä inde, Başqortstannan barğan güzäl zatlar Ğäräp Ämirlekläreneñ istälekle häm tarixi urınnarı belän dä tanışaçaq häm törle mädäni çaralarda da qatnaşaçaq.
