Böten dönyağa tanılğan Tatarstan cır häm biyu Ansamblenä 65 yıl tulu uñayınnan , şulay uq ansambl'neñ berençe citäkçese Zöläyxa Äxmätevanıñ tuuına 100yıl tuluğa bağışlanğan kiçä uzdı. Düşämbe könne G.Qamal teatrı binası mäydanında Tuğan tel bäyrämenä bağışlanğan çaralar kiçkä qädär görläp tordı.Anda bik küp şağirlär, artistlar çığış yasadılar.G Tuqay şiğerlärenä yazılğan cırlar yañğıradı. Kiçke säğät altı tiräsendä xalıq azaysa, soñraq xalıq tağın cıyıldı. Dimäk, keşelär milli sänğät belän qızıqsına. Häm milli sänğät ürnäkläre, berkemne dä bitaraf qaldırmıy.Menä şundıy tansıq häm dönya küläm milli sänğät ürnägen Tatarstan cır häm biyu ansamble kürsätep kilä.Qayda ğına bulsa da, säxnädä zatlı milli kiemnär kiep, moñlı itep xalıq cırların, citez biyüllär başqarğan ansambl'ne respublikada häm, çit illärdä yözmeñnärçä tamaşaçı qarağan.G.Qamal teatrı mäydanında açıq hawada Tuğan tel bäyräme uzğanda teatr zalınıñ eçe dä tamaşaçılar belän tulı ide. Anda ansambl'neñ 65 yıllıq yubiley kiçäse bardı. Bu kiçtä ansambl' üzläreneñ iñ zatlı äsärlären kürsättelär. Ansambl'ne qotlarğa Däwlät Sovetı räise Färit Möxämmätşin häm icadi oyışmalar wäkilläre kilgän ide. Ansambl’’neñ sänğät citäkçese Rinat Wäliev menä närsälär äytte:«Bu kiçägä kilgän Däwlät Sovetı räise Färit Möxämmätşin da, mädäniät ministrı İldus Tarxanov ta häm tamaşaçılar da programma belän bik qänäğät qaldı»,-dide Rinat Wäliev. Älbättä, bu bäyrämne ansambl'neñ berençe citäkçese Zöläyxa Äxmätovanıñ tuuına 100 yıl tuluğa turı kitergännär . Anıñ turında muzıka belgeçe professor Mäxmüt Niğmätcanov menä närsälär dide.«Zöläyxa Äxmätova 1904 yılda Magnitogorskiy şähärendä tua. Ufa sänğät texnikumında , annan Mäskäw konservatoriäsendä uqıp yuğarı belemle muzıkant, dirijer bula. Tatar filarmoniäsen citäkli. Tatar däwlät cır häm biyu Ansambleneñ citäkçese , oyıştıruçısı bulıp tarixqa kerep qala»,-dide Mäxmüt Niğmätcanov. Ansambl'neñ bügenge köne ni xäldä digän sorawğa Rinat Wäliev süzen menä närsälär dip däwam itte.«Bügenge köndä ansambl'gä bik küp yäşlär kilde. Şul yäşlär belän bez 65yıl buyına nigez salınıp, cıyılıp kilgän äsärlärne, törle cirlärdä yäşägän tatar xalqınıñ cırın , moñın däwam itäbez. Yaña programmada Perm tatarları biyue, Samara tatarları, Nijgar tatarları, Sarman yäşläre vokal'-xoreografik biyülläre quyıla»,-dide ul. Rinat Wäliev aldağı könnärdä Qazan şähäreneñ meñyellığına, borınğı Bolğar babalarıbız çorındağı biyüllärne xalıqqa qaytaru programması östendä eşläwläre turında da söyläde. Mälikä Basıyr,Qazan.
