Şuşı könnärdä Mäskäw ölkäseneñ Obninsk şähärendä mäktäp uquçılarınıñ fänni konferensiäse bulıp uzdı. «21–nçe ğasırnıñ fänni potensiäle» dip atalğan konferensiädä İjaw şähäreneñ tatar gimnaziäse uquçıları Alsu Yuziqayıva belän Rozalina Ğataullina da qatnaştılar. Alsu sigezençe, Rozalina unınçı sıynıfta uqilar. Qızlar ikese dä tellär belän qızıqsınalar. Gimnaziädä oyışqan uqıtuçılar häm uquçılarnıñ fänni berlegendä dä bik teläp şöğellänälär. Tatar, rus häm ingliz telendä mäqällärne çağıştıruğa bağışlanğan eşe belän Rozalina Ğataullina şähärdä uquçılar konferensiäsendä dä uñışlı çığış yasağan ide. Gimnaziä direktorı Gölzirä Äxmätşina süzlärençä, Alsu Yuziqayıvanı Udmurt däwlät universitetı uqıtuçıları tıñlap, anı inde xäzer universitetnıñ çit tellär bülegendä kürergä telibez dip beldergännär.
Obninsk şähärendä Rusiädän cıyılğan uquçılar aldında Rozalina Ğataullina şulay uq üzeneñ öç — rus, tatar, ingliz tellärendä mäqällärne çağıştıruğa bağışlanğan eşe belän çığış yasağan. İjawnıñ tatar gimnaziäse uquçısı yaxşı bäya alğan. Rozalina äle şundıy däräcäle zur konferensiälärdä berençe tapqır qatnaşa. Konferensiädä qatnaşuı belän bik qänäğät, üzem öçen bik küp kiräkle närsälär beldem, bigräk tä tellärne tağın da tiränräk öyränü teläge arttı, dip urtaqlaşı Rozalina Ğataullina konferensiädän qaytqaç.
—audio—
Mäktäp yıllarınnan uq balalarnı fän belep qızıqsındıra gimnaziä uqıtuçıları, alarnı çağıştırırğa, näticä yasarğa öyrätä. Ul ğına da tügel, üzläreneñ ezlänüläreneñ näticäläre belän başqalar aldında da çığış yasap, köçlären sınıp qararğa mömkinlek tudıra. Dörestän dä, yatqan taş müklänä di tatar xalqı, Şulay itep, balalar üzläreneñ qazanında ğına tügel, üz dairäsen kiñäytep, başqalar belän aralaşıp, belemnären arttıra. Rozalina äytüençä, fänni eş belän şöğellänü tuğan teleneñ neçkäleklären belergä dä etärgeç birä.
Xämidä Ğayfullina, «Azatlıq» radiosı, Udmurtiä.
