Accessibility links

шимбә, 10 декабрь 2016, Казан вакыты 10:04

Sverdlov ölkäsendä İslam dine fännärenän olimpiadalar ütäçäk


Bu könnärdä Krasnoufim rayonınıñ Raxman awılında balalar öçen Sverdlov ölkäse möselmannarınıñ Qazıyat idäräse tarafınnan oyıştırılğan dini seminar tämamlandı. Qışqı kanikul könnärendä Raxman awılı mäktäbe qarşında uzdırılğan bu seminarda 22 bala qatnaştı. Balalar irtädän kiçkä qädär mäktäptä dini däreslär alıp, islam dine qağidälären genä öyränep qalmadılar, räxätlänep yal da ittelär. Alar öçen mawıqtırğıç sport uyınnarı, törle qızıqlı yarışlar oyıştırıldı. Qışqı seminar balalar öçen qızıqlı da, faydalı da bulıp uzdı.

Sverdlov ölkäse möselmannarınıñ Qazıyat idäräse islam dine fännäre buyınça ölkä olimpiadası ütkärergä äzerlänä. Maxsus raslanğan nigezlämä buyınça, olimpiada öç etapta uzdırılaçaq – ğinwar ayında awıllarda, fevral''dä rayon häm şähärlärdä, mart ayında ölkä külämendä uzdıru küzdä totıla. Olimpiadada 10 yäştän alıp 14 yäşkä qädär bulğan balalar qatnaşa alaçaq. Bäygedä qatnaşuçılar öçen biremnär inde tözelgän. Äytergä kiräk, biremnär bik ciñellärdän tügel. Ämma daimi räweştä dini seminarlarda, cıyınnarda qatnaşqan, mäçetkä yörgän yäşüsmerlär öçen awır bulırğa tieş tügel dip sanıylar biremnärne tözüçelär. Bäygedä ciñüçelär räxmät xatları, maqtaw käğäzläre belän berlektä qimmätle prizlar belän büläklänäçäklär. Mondıy zur çaranı oyıştıru çığımnarın Qazıyat idaräse tulısınça üz östenä ala.

Bügenge köndä oyıştıru komitetı äğzaları ölkäneñ törle poçmaqlarına yörep, mäktäplärdä, mäçetlärdä bulıp qayttılar. Uqıtuçılarğa, uquçılarğa häm cirle din ähellärenä olimpiadanıñ qağidälären añlattılar, nigezlämä belän tanıştırdılar.

Tatar awıllarında yäşäwçelär olimpiadada bik teläp qatnaşaçaqların belderdelär. Ä menä rayon üzäklärendä häm şähärlärdä eş başqaçaraq tora. Qızğanıçqa qarşı, biredä, bigräk tä şähärlärdä, din totu olı yäşkä citüçelär öçen genä kiräk digän stereotip yäşäp kilä äle. Mäçetkä yörüçelär arasında yäşlär, balalar bik az.

Qazıyat idäräse islam dinen yäşlär arasında propagandala buyınça binihayä zur eş alıp bara. Ozaqlamıy uzdırılaçaq olimpiadalarnıñ maqsatı da şul uq.

İdärä räise Danis xäzrät Däwlätov fikerençä, yäşlärne din-äxlaq yulında tärbiäläw här möselmannıñ izge burıçı. Tormışnıñ här waqiğası, här mizgele bu maqsat öçen faydalanırğa tieş. Qazıyat idäräse bu yılğı bulaçaq Qorban bäyrämen dä üzençälekle itep uzdırırğa äzerlänä. Pervoural''ski mäçetenä öç avtobus belän awıllardan balalar alıp kilep, bäyrämne bergäläşep uzdıru küzdä totıla. Bäyräm programmasında ğädättäge ğayät namazı, wäğäz uqu, qorban aşınnan awız itü kebek çaralardan tış, tarixqa ekskursiä, islam dinenä bağışlanğan viktorinalar, xätta mönäcätlär öyränep cırlaw da bar.

Fäwiä Safiullina. Yekaterinburg

XS
SM
MD
LG