Yevropa säfären başlağan AQŞ rezidentı George Bush bügen Brüsseldä, Yevropa belän Amerika arasındağı "waqıtlı qarşılıqlarnı" beterep bula, Yevropa belän Quşma Ştatlar xäzer İzrael-Fälestin nizağın çişü maqsatı tiräsendä berläşä ala, dip belderde:
"Bezneñ iñ zur maqsatıbız – Yaqın Könçığışta tınıçlıq urnaştıru. Yalğış başlanğıçlar, tormışqa aşmağan ömetlär häm özelgän ğömerlärdän soñ İzrael belän fälestinnär arasında tınıçlıq buldıru – ireşerlek maqsat bulıp tora, dide Bush.
Oçraşu waqıtında Belgiä premyer-ministrı Guy Verhofstadt, Ğiraq mäs'äläsendäge qarşılıqlarnı beterep alğa taba adım yasarğa waqıt, dip belderde. Xäzer inde "kem xaqlı da kem xaqsız bulğanı turında" bäsäxläşüneñ mäğnäse yuq, dide ul.
Bush Yevropanı Ğiraqqa "säyäsi, iqtisadi häm iminlek mäs'älälärendä" yardäm itergä çaqırdı.
Rusiäne telgä alğanda Bush xökümätne demokratiä häm qanun xakimiäten urnaştıru säyäsäten alıp barırğa çaqırdı.
Süriä turında söylägändä Bush Süriäne Livanda okkupasiäne beterergä çaqırdı. Şulay uq İranğa möräcäğät itep amerikan prezidentı terrornı yaqlawnı tuqtatırğa häm atom qoralın citeşterüne tuqtatırğa öndäde.
Ğräp Ligası general sekretare Amr Mussa bügen Damaskta Süriä prezidentı Başar al-Assad belän oçraşqannan soñ, Süriä Livannan ğaskärlären çığarırğa niät belderde, dide.
