Accessibility links

шимбә, 3 декабрь 2016, Казан вакыты 12:48

Yekaterinburgta Räşit Wahapov kiçäse


Tatarstannıñ Uraldağı daimi wäkillege häm Yekaterinburg şähärendä eşläp kilgän Milli Media-Xolding yärdäme belän Bötendönya tatar kongressı başqarma komitetı, Qazan milli-mädäni üzäge, “Tatarstan” jurnalı, Nijgar tatarlarınıñ Qazan “Yaqtaşlar” cämğiäte tarafınnan oyıştırılğan Räşit Wahapov istälegenä bağışlanğan tatar cırı festivale küptän tügel Yekaterinburgta bulıp uzdı.

Şähärneñ iñ zur, yaqtı mädäniät saraylarınıñ bersendä ul könne enä töşärlek tä urın qaldırmaslıq bulıp xalıq cıyılğan ide. Tatarstannıñ xalıq artistları Zöhrä Säxäbieva, İskändär Biktahirov, kompozitor häm muzıkant Wäis Bäyrämov belän bergä xalqıbıznıñ küñel tiränlege çağılğan moñlı köylären tamaşaçığa Uralda yäşäp icat itüçe Tatarstannıñ atqazanğan artistı Xäydär Gıyl'fanov, cırçılar İl'dam Şäripov, Al'bina Waxitova, Boris Zakirov citkerdelär.

Festival'ne oyıştıruçılarnıñ berse, “Tatarstan” jurnalınıñ baş möxärrire Rifat Fättäxov äytüençä, festival' aldında ike töp maqsat quyılğan ide. Anıñ berençese xaqsız räweştä onıtıla başlağan böyek şäxesneñ isemen mäñgeläşterü bulsa, ikençese – tatar cırı, tatar moñı tiräsendä millättäşlärebezne berläşterü.

Rifat Fättäxov fikerençä, festival' üz maqsatına ireşte. Böten Rusiä buylap qolaç cäygän bu festival' ber üzençälege belän ayırılıp tora.

Finans oyıştıru yağınnan biredä Tatarstan byudjetınnan aqça tügelmi diärlek. Çığımnarnı kütärü çittä yäşäwçe tatarlar östendä. “Yekaterinburgta uzdırılğan bu festival'ne dä Tatarstannıñ Uraldağı daimi wäkillege belän bergä millät canlı, batır tatar yegetläre oyıştırdı”, - di ul.

Öç säğätkä suzılğan cır bäyrämendä barı tik mäşhür cırçı Räşit Wahapov repertuarınnan bulğan xalıq cırları yañğıradı.Tamaşaçılar, bigräk tä ölkän yäştäge apa-abıylar küz yäşlären tıya almadılar. Axırdan alar oyıştıruçılarğa qat-qat olı räxmätlär äytep, mondıy moñlı konsertlarnıñ yışraq kilüenä teläk belderdelär.

Ämma oyıştıruçılarnı ber närsä borçımıy qalmadı. Qayber yäşlärgä xalıq moñı töbe-tamırı belän kerep citä almadı bulsa kiräk. Alar arasında çığıp-kerep yörüçelär dä buldı.

Soñğı waqıtta tatar konsertları yış kilep tora, älbättä. Ämma alar kübesençä yaña estrada köylärennän tora. Tatar konsertlarına yäşlärneñ küp yörüe quanıçlı xäl bulsa da, alarğa, bigräk tä şähärdä tuıp-üsüçelärgä xalıq köyläreneñ tiränlegen añlatu öçen bik küp eşlise bar ikän äle. Rifat äfände Fättäxov bu turıda üz fikeren bolay dip belderde: - “Faciğä şunda, - dide ul, - berniçä buın keşe tatar moñın işetmiçä, anı añlamıyça, xalıq xisen cır arqılı yörägenä señdermiçä üste. Bilgele inde, ber festival' uzdıru belän genä yäşlärneñ añın üzgärtep bulmıy. Bu taraftan äle bik nıqlap eşlise bar”.

Uralda icat itüçe tatar cırçıları da moña iğtibar itmi qalmadı. Yäş buluına qaramastan, “Xämdiä” şikelle iskitkeç moñlı xalıq cırların cirenä citkerep, osta itep başqaruı belän ayırılıp torğan Boris Zakirov bu turıda üz fikeren bolay dip belderde: - “Yäş tatar estradası üsü belän bergä küñel cırlarıbız artqı plannarda qala birä. Konsertlarda estrada cırları belän berrättän xalıq cırların da yışraq başqarırğa kiräk”.

Konserttan soñ da, festival'ne Yekaterinburg yağınnan oyıştıruçılar Qazan qunaqları belän bu turıda fiker alıştılar. Bergä-bergä eşlise bik küp eşlär turında süz alıp barıldı.

Festival' tämamlanğannan soñ da, Yekaterinburg şähärendä Qazan artistları häm Ural cırçıları qatnaşında tatar konsertları däwam itte. Şähärneñ iñ çittä urnaşqan rayonnarın da isäpkä alıp, Milli-Media-Xolding citäkçeläre xalıq öçen buşlay tağın dürt konsert oyıştırdılar. Soñğı yomğaqlaw konsertı şähärneñ sirk binasında, öç meñ keşe sıyışlı zur zalda uzdırıldı.

Cır bäyrämnäre xalıq küñelendä iskitkeç uñay tä'sirlär qaldırdı.

Fäwiä Safiullina. Yekaterinburg.

XS
SM
MD
LG