Rusiäneñ keşe xoquqları wäkile Vladimir Lukin, Çeçnädä kiñ külämle keşe xoquqları bozılu turında iğlan itte. Anıñ yıllıq xisabında äytelgänçä, bu xoquqlar häm federellar, häm çeçen suğışçıları tarafınnan bozıla. Lukin süzlärençä, Rusiä räsmiläreneñ Çeçen suğışçıları belän söyläşergä telämäwe – federal köçlärneñ xoquq bozuları cazasız qalırğa tieş digänne añlatmıy. Lukinnıñ xisabı – xalıqara xoquq yaqlaw oyışmaları Çeçnädäge wazğiätne Yevropada iñ zur humanitar qaza dip atağannan soñ – ikençe köngä dönya kürde. Kiçä Berläşkän Millätlär Keşe xoquqları komissiäseneñ Jenevada ütkän oçraşuında, Helsinki Federatsiäse häm başqa xalıqara törkemnär – Rusiäneñ Kavkaz töbägendä, şul isäptän Çeçnädä keşe urlawlar, cäberläwlär, qanunsız qulğa alular, üterülär kiñ taralış aluğa tirän borçılu belderde.
