Accessibility links

шимбә, 3 декабрь 2016, Казан вакыты 20:49

Ufada Başqortstan tatar yazuçıları qorıltayı ütäçäk


18 yün könne Ufada Başqortstan Tatar Yazuçıları berlegeneñ qorıltayı ütäçäk. Anda, älege qorıltaynı oyıştıru qomitetı räise, Başqortstan Tatar cämägätçelek oyışmaları berlegeneñ mädäniät häm sänğät bülege citäkçese Alik Loqmanov äytüençä, qayber oyıştıru eşläre tikşereläçäk, Berlekneñ räise Räif Ämirovnıñ xisap çığışı tıñlanaçaq. Şulay uq Başqortstanda tatar prozası, tatar şiğriäte torışı xaqında ayırım doqladlar bula. Bu qorıltay başta 16 iyüngä bilgelängän ide. Ämma, äzerlek eşläre tämamlanmaw häm bina mäsäläse xäl itelmäw säbäple, anı şuşı şimbägä küçerergä buldılar. Başqortstan Tatar yazuçıları berlege, un yılğa yaqın mäxkämä yulların taptağannan soñ, nihäyät, ike yıl elek räsmi terkälü ütä alğan ide. Ämma, Xökümät yağınnan finanslanu bulmağaç, anıñ eşçänlege älegä qädär berniçek tä sizelmäde. Çönki nindi dä bulsa eşlär alıp baru öçen azmı-küpme aqça kiräk. Xäzer respublik tatar milli oyışmaları citäkçeläre, Tatar yazuçıları berlege eşçänlegen canlandırıp cibärü öçen, törle mömkinleklärne barlıy. Şimbä könne ütäçäk qorıltayda da töp söyläşü şul xaqta bulaçaq. Qorıltayğa Tatarstannan da qunaqlar çaqırılğan. Tatarstan Yazuçılar berlege isemennän Ufadağı bu möhim çarada tanılğan ädiplär Äxmät Ğädel belän Danil Salixov ta qatnaşaçaq.

Başqortstanda küp mixnätlär aşa oyıştırılğan häm räsmi terkälgän Tatar yazuçıları berlege kiläçäktä eşläp kitä alırmı, aña tatarça icat itüçelärne cälep itep bulırmı? Şuşı sorawlar belän bez berniçä keşegä möräcägät ittek. Beräwlär Tatar yazuçıları berlegeneñ kiläçägenä ömet beldersä, ikençeläre aña ikelänebräk qaradı. Qorıltaynı oyıştıru qomitetı räise Alik Loqmanov isä Başqortstan tatar milli oyışmalarınıñ bu Berlekneñ kiläçägenä ömet bağlawın äytä. Başqortstannıñ xalıq şağire, milläte tatar bulğan kürenekle ädip Marat Kärimov ta bu qorıltayğa bäyle qayber uyların äytte. Anıñ fikerençä, Başqortstan Tatar Yazuçıları berlegen oyıştıru tabiği xäl, çönki respublikta tatarça icat itüçelär bik küp. Ämma Tatar Yazuçıları berlegenä respublika büdjetınnan yärdäm kürsätelmäsä, anıñ nıqlap eşläp kitüenä ömet totıp bulmıy. «Cämägät başlanğıçında ğına bu Berlekneñ eşen cimeşle itep bulmıy, – di Marat ağa Kärimov. – Ä bügenge köndä, respublik citäkçelege dä, Başqortstan Yazuçılar berlege dä Tatar yazuçıları berlegenä tiskäre mönäsäbättä bulğanda, aña finanslar bülenüe bik ikele. Annan bu berlekkä respubliktağı inde şaqtıy tanılğan tatar ädiplären cälep itü dä üze ber problem. Çönki alar Tatar yazuçıları berlege eşçänlegendä qatnaşudan uttan qurıqqan kebek qurqa. Çönki anda küçü belän tatar yazuçıların şunda uq ezärlekläw başlanaçaq, alarnıñ kitapların da näşer itmäyäçäklär». Marat Kärimov äytüençä, Başqortstan Tatar yazuçıları berlegenä räsmi xaqimiätlär tarafınnan uñay mönäsäbät bulu belän anda älegä Başqortstan Yazuçıları berlegenä yörüçe distälärçä tatar ädipläre dä räxätlänep küçär ide. Başqortstandağı tanılğan tatar şağire Färit Ğabderäximneñ dä Başqortstan Tatar yazuçıları berlege eşçänlegenä qarata üz mönäsäbäte bar. «Min şuşı berlekne oyıştıru öçen häm anı räsmi terkätü öçen un yıl çaması ğömeremne, köçemne birdem, törleçä qısularğa duçar buldım. Şuña kürä dä Başqortstan Tatar yazuçıları berlegeneñ kiläçägenä min berniçek tä bitaraf bula almıym. Siksänne qualasam da, min anıñ nıqlap ayaqqa basıp kitüe öçen quldan kilgänneñ barsın da eşläyäçäkmen». Färit äfände süzlärençä, Başqortstan tatar yazuçıları berlege başqort yazuçıları berlege kebek ük tulı xoquqlı yäşärgä häm barlıq östenleklärdän faydalanırğa xaqlı. Xökümät finanslawın taläp itärgä häm şuña ireşergä kiräk, di tatar şağire. Şulay itep, bu şimbädä Başqortstan Tatar yazuçıları berlegeneñ kiläçäk yazmışı xaqında eşlekle söyläşü bulır dip kötelä. Älege qorıltayda Ufadan häm respublik rayonnarınnan citmeştän artıq qäläm ähele qatnaşaçaq.

XS
SM
MD
LG