Tönyaq Koreanıñ atom programmasına bağışlanğan 6 yaqlı söyläşülär başlanırğa 1 kön qala, bügen Pekinda Amerika Quşma Ştatları Däwlät Sekretare urınbasarı Christopher Hill häm Tönyaq Korea tışqı eşlär ministrı urınbasarı Kim Kye-Gwang oçraştı. Christopher Hill, bügen barı tik tanışu, fiker alışu häm mäğlümatlärne çağıştıru buldı, dip belderde. Bügen, irtägä başlanaçaq söyläşülärdä qatnaşuçılarnı qarşı alu mäclesendä Qıtay tışqı eşlär ministrı Li Zhaoxing, oçraşuda alğa kiteş bulaçağına ömet belderde: "Minem fikeremçä, söyläşülär – söyläşülär genä bulıp qalmasqa tieş. Söyläşülärdä tärräqiät buluın telibez. Korea yarım utrawında atom mäsäläsen söyläşülär yulı belän çişep, tınıçlıqqa ireşergä telibez," dide Qıtay ministrı. Uzğan yıl Tönyaq Korea 6 yaqlı söyläşülärdän baş tartıp, atom qoralına iä buluın beldergän ide. İrtägä Pekinda Tönyaq häm Könyaq Korea, Amerika Quşma Ştatları häm Rusiä, Qıtay häm Yaponiä diplomatları oçraşaçaq.
