Accessibility links

якшәмбе, 11 декабрь 2016, Казан вакыты 07:21

Sotsial ipoteka belän tözelgän 500 fatir äzer


Küp söylängän, keşelär ömetlär bağlağan sotsial ipoteka programması turında beraz mäğlümat çığa başladı. İnde 5000 meñ yaqın keşe isemlekkä kergän, inde 500 fatir äzer ikän. Bu mäs’älädä añlatmalar sorap, Byudjettan tış toraq fondına möräcäğät ittek häm tübändäge añlatmalar aldıq.

Çınnan da, sotsial ipoteka programması nigezendä, respublika buylap, 500 fatir tözelgän. Ämma alarğa däğwä itü öçen, respublika qanunı quyğan taläplärne ütärgä kiräk. Sotsial ipoteka programmasına Tatarstanda yäşäwçe, räsmi terkälgän, üz torağı 18 kv metrdan da zur bulmağan keşelär ömetlänä ala. Tezeleşne alıp bara torğan toraq fondı wäkilläre äytüençä, telägän keşe yäşägän rayondağı toraq komissiäsenä tieşle käğäzlär iltergä tieş. Programmada qatnaşuçı keşe häm anıñ ğailäse turındağı küp sanlı mäğlümatlar toraq komissiäsendä 2 ay däwamında tikşerelä ikän. Çınnan da bu keşelär toraqqa moxtacmı, yalğan käğäzlär kitermägännärme häm başqa şundıy sorawlar belän tikşerülär yaza. Toraq fondı xezmätkärläre dä tikşergännän soñ, keşe älege programmada qatnaşa alamı, yuqmı, şuşı sorawğa cawap birä. Küp sanlı käğäzlär cıyıp, 2 ay näticäsen kötkännän soñ da, tikşerüçelär, däğwälawçı keşeneñ ğözeren kire qağarğa mömkin. Mäsälän, sentäberdä, 150 keşe sotsial toraq tieş tügel, digän cawap alğan. 4 meñgä yaqın ğailäneñ dokumentları, tözätep birergä, dip kire qaytarılğan. Fondnıñ matbuğat särkätibe Sariä Sanieva añlatqança, bu däwlät birgän uñaylı kredit şartları belän xaqı bulmağan keşelär fatir almasın öçen, programmağa ışanıç tusın öçen eşlänä. Toraq fondı citäkçese, cıyılışlarnıñ bersendä, tieşle käğäzlär tutıru häm röxsätne alu bik küp waqıt taläp itüne tanıy.

İnde sezneñ mäs’älädä uñay cawap kilä ikän, sotsial ipoteka programmasında qatnaşırğa röxsät birelsä, sezne isemlelekkä kertäçäklär. Toraq fondı mäğlümatlarına qarağanda, älegä 5 meñgä yaqın keşe andıy berläşterelgän isemlelekkä kertelgän. İsemlekkä kergännän soñ, «Kiläçäkne tözibez» digän kooperativ belän kileşü tözü sorala. Şunnan soñ, aqçanı tüli başlarğa bula. Kooperativ xisabına kübräk aqça küçergän soñ häm irtäräk eşlägän sayın, däğwälawçığa ballar quşıla. Ballar sanı zurraq bulğan sayın, däğwä itüçe, fatirlarlar bülgändä, uñaylırağın saylap ala ala ikän.

Sotsial ipoteka programmasınıñ fondın formalaştıruda respublika şähär häm rayonnarı qatnaşa. Toraq fondı älegä tüläwlärneñ soñaruı turında xäbär itä. Mäsälän, iñ küp tülägän şähär - Çallı, iñ azı – Ägerce häm Minzälä. Çallıda inde fatirlarda yäşilär, ä Qazanda, sotsial ipoteka programması quzğalmağan.

Bikä Timerova

.

XS
SM
MD
LG