Putin ömetländergän üzgäreşlär sälämätlek saqlaw ölkäsen dä iğtibar üzägendä totar dip kötelä. Prezident täqdim itkän 4 mäs'älä arasında tabip häm şäfqät tutaşlarınıñ xezmät xaqın kütärü dä qaralğan. Kiläse yılnıñ yanwar ayınnan uçastok terapevtları, pediatrlar häm gomumpraktiкa tabiplarınıñ xezmät xaqı 10 meñgä, ä alar belän eşläwçe şäfqät tutaşlarnıqı 5 meñgä artır dip kötelä. Monıñ öçen federal' byudjettan kiläse yılğa 12,8mlrd.sum aqça bülengän dä inde.
Ni öçen näq uçastok tabipları häm alar belän eşläwçe şäfqät tutaşlarnıñ xezmät xaqına prezident iğtibar itkän? Rusiäneñ sälämätlek saqlaw ministrı urınbasarı äytüençä, Rusiädä poliklinikalar, rayon häm uçastok şifaxanäläre, berençe yärdäm kürsätü xezmätläre iñ awır xäldä. Kadrlar tuplanuı 50-70%nı ğına täşkil itä. Şunıñ näticäse - poliklinikalardağı çiratlar, awırularnı sıyfatsız tä'min itülär. Xezmät xaqın arttıru kadrlar mäs’äläsen xäl itäçäk, dip sanıy Rusiäneñ sälämätlek saqlaw ministrı urınbasarı Vladimir Starodubov.
Putinnıñ täqdimnäre tormışqa aşsa, şäfqät tutaşınıñ xezmät xaqı fännär kandidatınıñ, xätta doktorlarnıqınnan da kübräk bulaçaq. Xökümät wäkile äytüençä, nihayät uçastokta eşläwçelärneñ xezmäte tieşleçä bäyälänäçäk. Läkin bit başqa tabiplarnıñ, mäsälän, xirurg, akuşer-ginekologlarnıñ da eşe uçastok tabiplarnıqınnan ber dä kim tügel häm şundıy uq xäyerçe xezmät xaqı. “Vostoçnıy Ekspress” gäzite yazğança, xökümät iğtibarınnan çittä qalğan tabiplarnıñ da xezmät xaqları yaqın kiläçäktä kütärelmägän oçraqta, aq xalatlı zatlar zabastovkalar iğlan itärgä mömkin. Şulay da Rusiäneñ ministr urınbasarı kiläçäktä başqa tabiplarnıñ da xezmät xaqları artuğa baraçaq dip ışandıra. Tabip xezmäte 15 meñ sumğa bäyälänäçäk, di xökümät wäkile.
Berençe sentäberdän Tatarstandağı uqıtuçılar häm tabiplarnıñ xezmät xaqı 11%qa arttı. Respublikada byudjet tarmağında eşläwçe 300 meñ keşeneñ xezmät xaqına 378 sum östälde. Läkin şulay uq yağulıq häm başqa törle bäyälärneñ dä artuı sizelmi qalmadı. Ä Putinnıñ täqdimnärenä Qazandağı tabiplar, şäfqät tutaşları niçek qarıy? Uçastoklarda eşläwçe mediklarnıñ fikere:
- Xezmät xaqım 3 meñ sum. Şäfqät tutaşı bulıp 23 yıl eşlim. Putin täqdimnäreneñ tormışqa aşuına ışanasıbız bik kilä. Läkin bik ışanıp ta betmibez, çönki bezgä bik az tülilär. Yaña tabiplar, şäfqät tutaşları şifaxanägä kilmi, şul elek kilgännäre eşli inde. Yäşlär kilä, ämma ber yıldan kitep tä baralar. - Uçastok tabibı bulıp 36 yıl eşlim. Oklad 3500. Berençe kategoriä. Täqdim itelgän üzgäreşlärgä bik şatlanıp qarıym. Ämma ışanmıym.
Al'binaZäynulla
