Ufada tanılğan cırçı, Başqortstannıñ häm Tatarstannıñ atqazanğan artistı Aydar Ğälimovnıñ yübiley konsertları başlanıp kitte. Bıyıl Aydar Ğälimovnıñ icat eşçänlege başlanuğa 15 yıl tuldı. Şuşı uñaydan “Aydar” teatr-studiäse yegeteläre häm qızları ör-yaña konsert programmasın äzerläp bette. Yaña programmanı äzerläwdä bıyıl da kürenekle rejisser Rifkät İsrafilov zur yärdäm kürsätte. Tamaşanıñ rejisserı ul bulğaç, älege yübiley konsertınıñ uñışlı bulaçağın aldan uq sizemlärgä mömkin ide. Konsertnıñ ssenarien Ufa “Nur” tatar däwlät drama teatrı aqterı, Başqortstannıñ atqazanğan artistı Mäxmüt Fatıyxov yazdı. Yaña tamaşanı populyar sänğät kollektiwı Başqortstannıñ häm Tatarstannıñ berniçä rayonında kürsätep tä ölgerde inde. Ä menä xäzer yübiley proğrammasın Ufa tamaşaçılarına täqdim itä “Aydar” teatr-studiäse. Bıyılğı proğrammanıñ üzençälege närsädä, anda nindi cırlar başqarıla. Tamaşalar başlanır aldınnan “Azatlıq” xäbärçese cırçı Aydar Ğälimov belän oçraşıp qısqa ğına äñgämä qorıp aldı. (äñgämä comğa tapşıruında)
Äle anıñ citäkçelegendäge “Aydar” teatr-studiäse Ufada üzeneñ yaña konsert proğramması belän çığışların başladı. Tamaşalar 6 noyäbrgä qädär Ufanıñ törle mädäniät saraylarında däwam itä. Ä annan soñ şuşı uq proğramma belän, Aydar Ğälimov, här yıldağıça, Qazandağı çığışların başlıy. Qazan tamaşaçıları häm qunaqları tanılğan cırçınıñ yübiley tamaşasın 21-27 noyäbr könnärendä kürä alaçaq.
