Accessibility links

дүшәмбе, 5 декабрь 2016, Казан вакыты 13:38

Qoş kizüe Tatarstan xalqın poşamanğa sala


Sälämätlek saqlaw ekspertları Soğud Ğäräbstanı citäkçelegenä qoş grippı epidemiäse çığa qalsa bıyıl Xacğa barunı tıyu kiräk digän möräcäğät belän çıqqannar. Bu xaqta İslam ru xäbär itä.

Qoş grippı turındağı törle imeş-mimeşlär cil tizlege belän tarala. Ber kön äle 1000 kilometr yıraqlıqta qoş awıruı tabılğan dip söyläsälär, ikençe kön inde kürşeneñ berär tawığı üzen säyerräk totsa xalıq qurquğa qala. Mondıy xällärne soñğı waqıtta Tatarstan rayonnarında da küzätergä mömkin. Törle ğäybätlär bulıp tora. Ul'yan ölkäse Tatarstan belän yänäşä tora. Bua, Täteş, Apas rayonnarı iñ kübe digändä 150 çaqrım yıraqlıqta urnaşqan. Ber könne Ul'yanda qoş awıruı tabılğan tizdän Apas rayonına da kilep citä ikän digän mäğlümat taralğan. Televizordan qaz-ürdäklären suyıp yandıru, yäisä kümü ğälämätlären kürep qurquğa qalğan xalıq poşamanğa töşkän. Şul uq waqıtta qoşlarnı rayon citäkçelege tarafınnan 15 noyäbergä qädär suyıp beterergä quşılğan dip tä söyli başlağannar xalıq arasında. Noyäber urtasına suyılmıyça qalğan qoşlarnı yuq itäçäklär dielgän. Bilgele, qaz-ürdäklärne xalıq bozılmasın öçen yış qına qorau töşep könnär qatırıp cibärgäç suya. Ämma gönah şomlığına bıyıl könnär cılı toru säbäple bu eş soñraqqa qalğan. Ğadi xalıqnıñ küpçelege 5-6 ay simertkän ürdäk-qazlardan qolaq qağası kilmägänlektän şulay itep könneñ qatırğanın kötep tormasqa bulğan. Doşmanğa qalmasın digändäy, qaysı suyıp tozlap quyğan, qaysı satqan, qaysı üzenekenä sıymağaç kürşese yäki tuğan-tumaçası suıtqıçına tutırğan. Ämma şunısı qızıq, 15 noyäber uzuğa bu imeş-mimeşlärdän cillär iskän. Wäğdä itelgän tikşerü dä yuq, batırlarça üz qaz-ürdäklären suyışmıyça qalğannarnıñ qoşları da qañğıldaşıp yöri birä di. Apas rayonı xakimiäte apparatı citäkçese İldus Zinnatullin

Bezneñ 30 noyäberdä Qaz ömäse bulaçaq. Bälki şuñadır. Annarı inde suıta başladı, xalıqnıñ aşatırına da yuqtır.

Şulay itep qoş grippı ğälämätläre Tatarstan rayonnarında da arta bara. Älegä çirat qaz-ürdäkkä genä kilep citsä, kiläçäktä bu tawıqlarğa da qağılmas dip kem äytä ala.

Landış Xarrasova

XS
SM
MD
LG