Başqortstannıñ Berläşkän oppozitsiäse oyışmaları bu şimbä könne Ufada miting ütkärergä cıyınğan ide. Uram cıyının 26 noyäbrdä ütkärergä cıyınuları xaqında belderep, alar qanun nigezendä, aldan Ufa şähäre xaqimiätenä möräcägät tä itkän. Ämma atnaqiç könne Berläşkän oppozitsiä citäkçeläre üz möräcäğätenä başqala xaqimiäte başlığı urınbasarı Aleksey Oşçepqov qultamğası quyılğan tiskäre cawap aluın xäbär itte. Oppozitsiä citäkçeläreneñ berse, professor Mäcit Xucin süzlärençä, Oşçepqov äfände üzeneñ cawap xatında, yuğarı türälär ğädätlängänçä, “süz botqası” quyırtıp, älege çaranıñ ütkärelüenä röxsät birelä almawın citkergän.
Mäcit Xucin Ufa xaqimiätläreneñ başqala meriäse qarşındağı Lenin mäydanında miting oyıştırırğa rizalıq birmäwen ğädi genä añlata. “Xaqimiätlär oppozitsiä çığışlarınnan uttan qurıqqan kebek qurqa, şuña kürä dä alar, çirattağı tapqır, uram cıyının ütkärügä qarşı töşte, - di Mäcit äfände. – Älbättä, oppozitsiä köçläre älege uram cıyınnarında xaqimiätlärgä bik küñelle bulmağan sorawlar häm taläplär quyarğa äzerlängän ide. Monı aldan uq çamalağan räsmi citäkçelär bälasennän baş-ayaq, digänder inde”.
Şulay da Başqortstan Berläşkän oppozitsiäse oyışmaları miting oyıştırudan waz kiçmi. “Bez üzebezneñ uram cıyının dekäbr ayınıñ berençe yartısında barıber ütkäräçägebezne belgertep, Ufa şähäre xaqimiätenä tağın xat cibärdek, - di Mäcit Xucin. – Anda da Başqortstandağı sotsiäl häm säyäsi xällärgä qağılışlı taläplär quyılaçaq”.
