Qazannıñ citäkçese, kem xäzer, dip sorasağız, yalğışmıyça cawap birü awır bulır. Çönki, matbuğatta äleğä qädär gel İlsur Metşinnıñ iseme yañğırap tordı, ul mäktäplärne, şifaxanälärne tikşerep yöri, ämma annan östäräk torğan tağın ber Qazan citäkçese buluı turında munisipal reformanıñ tärtiben yaxşı belgännär genä çamalıy ide. Bu xaqta, «Azatlıq» tapşırularında söyläşkänebez bar.
Belgänegezçä, başqarma komitet başlığı itep, bäygedä ciñgän nämzät, İlsur Metşin saylanğan ide. Anı kontrakt nigezendä, munisapal berämlek başlığı eşkä qabul itte. Şuşı munisipal berämlek başlığı Kamil İsxaqov, wazifalarınnan kitüe turında xäbär itte. Ä anıñ wazifaların başqaruçı itep, Räfis Borhanov saylandı. Şähär duması utırışı turında tulıraq itep, şähär idäräse başlığı süzçese Natalya Bastrokova xäbär itte : “Kamil Şamil ul şähär başlığı munisipal berämlek başlığı häm deputat wazifalarınnan waqıtınnan irtäräk azat itüne soradı. Bu anı Yıraq Könçığışta Prezidentnıñ wäqälätle wäkile itep bilgelänü säbäple häm Wahapov okrugında saylawlar bilgeläw, saylawçılarnıñ xoquqların tä’min itü yözennän eşlände. Şulay uq, idärägä daimi eşläwçe başlıqnıñ berençe urınbasarı wazifası kertelde, bu urınğa ber tawıştan deputat häm Waxitov rayonı başlığı Räfis Borhanov saylandı. Aña, saylawlar ütkärelgänçegä qädär, munisipal berämlek başlığı wazifaların başqaru yöklände. Kamil İsxaqov, Räfis Borhanov şähärne yaxşı belä, şähär xucalığı mäsällärenä iğtibar belän qarıy, dip bilgeläp ütte. Räfis Borhanov, deputatlarğa kürsätkän ışanıç öçen räxmät süzlären belderde.
Räfis Borhanovqa 44 yäş, ul çığışı belän – Möslim rayonnan. Şulay itep, munisipal berämlek başlığı wazifaların, martqa qädär genä bulsa da, Räfis Borhanov başqaraçaq. Ul, şähär Duması citäkçese dä bulaçaq digän süz dä. Belgänegezçä, Räfis Borhanov äle şähär belän kem idärä itüe bilgele bulmağan waqıtta da, mömkin nämzät itep telgä alınıp kilde. Älegä qädär, munisipal şähär başlığı wazifaların başqaruçı itep, Kamil İsxaqovnıñ deputatlar şurasındağı urınbasarı Lyudmila Andreyeva saylanıp torır, dip farazlanğan ide. Ämma, qayber analitiklar añlatuınça, biredä Kamil İsxaqovnıñ tügel, ä respublika xakimiätläreneñ komandası ciñüe kürenä. Borhanov belän İlsur Metşinnıñ xezmättäşlege niçek barır, yaqındağı aylar kürsäter. Ä Kamil İsxaqov, munisipal berämlek başlığı häm deputat wazifalarınnan kitkännän soñ, yañadan xezmättäşlär belän saw bulaşqan. Anı Qazannıñ, sotsial, iqtisadi, ruxi üseşe, başqalanı çit illärdä tanıtuğa quyğan tırışlıqları öçen maqtaw gramotasın belän büläklägännär. Şähär idäräse xezmätkärläre, elekke Qazan başlığına, «Yaña Ğasır» kanalın qararsız, dip zamança televizor büläk itkän.
Elekke Qazan başlığı Kamil İsxaqov, yaña yıl qarşılarğa yañadan qaytırğa wäğdä tiep, Xabarovskiyğa kitep bardı. Ä aña qädär aña, Federal tatar milli-mädäni avtonomiäse möräcäğäte tapşırıldı. Anda bolay dip äytelä. Yıraq könçığıştağı milli mädäni oyışmalar, problemaların xäl itkändä, sezneñ yärdämegezgä ömetlänä, Federal tatar avtonomiäse şurası Yıraq könçığışta milli-mädäni proyektlar aşırılğanda, Wäqälätle wäkil idäräse belän xezmättäşlek itärgä äzer, dielä älegä xatta. Şulay uq, federal tatar möxtäriäte, Kamil İsxaqovnıñ İslam konferensiäse oyışması utırışında qatnaşuın istä totıp, islam illäre belän xezmättäşlek turındağı tarixi kitap büläk itelde. Yıraq Könçığışta häm möselman dönyasında eşçänleğeğez uñışlı tämamlanır, dip ışanam, dielä älege xatta.
Bikä Timerova.
