Мәскәүдә җеназа, Кизләрдә шартлаулар

31 март 2010

Дагыстанның Кизләр шәһәрендә иртән бер бер артлы ике шартлау булды. Соңгы хәбәрләргә караганда, 12 кеше үлгән. Икенче шартлау ФСБ, милиция һәм мәктәп янында булган. Уку йортының тәрәзәләре ватынлган һәм түбәнең бер өлеше җимерелгән. Мәктәптә укучылар булмаган.

Ике шартлау да Кизләрнең үзәгендә, Мәскәү районында булды. Иртәнге 8.45-тә “Искра” кинотеатры янында шартлаткыч куелган “Нива” машинасы шартлады.

15 минуттан шунда урнашкан ФСБ, эчке эшләр министрлыгы бүлеге һәм мәктәп янында шартлау булды. Бу биналар яныннан барган машинада утырган интихарчы үз үзен шартлаткан, дип хәбәр ителә.

29 март Мәскәү метросында булган шартлауларда 39 кеше үлде. Бүген корбаннарны күмү йолалары үтә.