Кырымны аннексияләгән көннәрдә кырымтатарларга бик күп вәгъдәләр биргән яңа "хакимият" ярты ел узуга кырымтатарларга каршы репрессияләрне аеруча көчәйтеп җибәрде. Кырымтатар оешмаларын биналарыннан куып чыгаралар, иртә таңнан аларның өйләренә, мәктәпләргә, мәчетләргә корал, наркотик, тыелган дини китаплар эзләү сылтавы белән тентүләр уздырырга киләләр. Билгесез кешеләр алып киткән кырымтатарлар югала бара. Кырым "хакимияте" башлыгы Сергей Аксенов бу чараларны "кырымтатарларны кайгырту" дип атады.