Һәлак булганнар саны 35кә җитүен "Аль-Арабия" телеканалы хәбәр итә. Моңа кадәр сүз 25 корбан турында бара иде. Кимендә 26 кеше яраланган диелә.
Кораллы һөҗүмдә хәрби киемгә охшаган киемле унлап кеше катнашкан. Һөҗүм итүчеләр ике машинада хәрәкәт иткән һәм пулеметтан аткан.
Хаҗилар Эль-минья шәһәрендә урнашкан Самуил монастыренә юнәлгән булган.
Һөҗүм өчен җаваплылыкны әлегә беркем дә алмаган.
Коптлар – Мисырның христиан динендәге азчылыгы. 6 миллион копт-христиан ил халкының 9 процентын тәшкил итә. Аларга һөҗүмнәр еш булып тора. 9 апрельдә Танта шәһәрендә Георгий чиркәвендә шартлау нәтиҗәсендә 27 кеше һәлак булган иде. Тагын 16 кеше Александриядә Арк чиркәвендәге шартлау корбаны булды.
