Академик Роберт Нигъмәтуллин татар-урыс дуслыгын данлады
Ул тырышып татарча сөйләде, аннары урысчага күчте. "Татарлар ике телле, урыс телле татарлар барлыкка килде. Бу борчый, аз гына булса да бу хәрәкәт акрынайсын иде. Татар-монгол изүе турында ишетеп үстем, урыслар һаман да моннан арына алмый. Русиядә начар яшәешне дә "иго"га сылтыйлар. Татар ханнары, урыс кенәзләре мөнәсәбәтләре авыр булган, әмма бу - тарих. Элек татар булмаса, башкорт булмый, башкорт булмаса, татар булмый ди идем. Хәзер татар булмаса, урыс булмый, урыс юк икән, татар булмый", диде Нигъмәтуллин.
Иптәш Илшат Гафуровка тагын бер "сәлам"
Танылган галим Рәшит Сюняев: "Чит илләрдә яшәгән, татар мохитеннән аерылган кешеләр күп, алар арасында мәртәбәле кешеләр бар, әмма татар телен белмиләр. Нишләсен соң алар? Татар икәнен беләләр, горурланалар. Конгресс аларны тупларга, Казанга ярдәм итүләрен күндерергә кирәк", диде ул.
Аның КФУ сәхифәсе урысча да, тагын берничә телдә эшли, ә ник татарчасы юк, бу татарларны мыскыллау дигән соравы алкышларга күмелде.
БДИ дигән баш бәласе
Корылтай мөнбәреннән Ш. Мәрҗани исемендәге татар гимназиясе мөдире Камәрия Хәмидуллина БДИ татар теленә зур зыян сала, вакыт узу белән татар әдәбиятын, матбугатын укырлык кеше калмаячак дип сөйли.
Конгресс корылтаеның икенче өлеше башланды
Русиянең татар милли-мәдәни мохтарияты рәисе, Русия Дәүләт думасы депутаты Илдар Гыйлметдинов чыгыш ясый. Конгресс белән мохтарият бер-берсе белән хезмәттәшоек итми дигән тәнкыйть күп. Бу хакта Миңтимер Шәймиев та әйтеп алды. "Барысы белән дә уртак тел табып эшлибез. Татар оешмаларын каршы куярга тырышкан егетләргә туктарга кирәк. Барыбызга да эш җитәрлек, талашмый гына бергә эшләргэ кирәк дисә дә, төбәкләрдә мохтарияты көчле икән, конгрессның филиалы кирәкме икән?" дигән фикер яңгыратты.
Депутат татар балалары БДИны татар телендә тапшырырга тиеш, федераль канун кирәк дип әйтте. Көз көне туган телләр хакында парламент утырышы була диде ул. "Кызганыч, Русия Мәгариф министрлыгы безне ишетми", дип белдерде.
Җырчы Алсу ике татар президенты арасына басып теләк тели
Корылтай делегатлары һәм кунаклары төшке ашны "Казан" милли-мәдәни үзәгендә ашады. Өстәлләр мул күренә, татарлар сыйлый да, сыйлана да белә.
Ә корылтай эшен яктырткан журналистларны Татарстанның мәдәният министрлыгында ашатканнар. Бу фото - аларның табыннарыннан. Делегатлар менюсыннан аерыла, углеводларга басым ясалган. Шәт, тамаклары туйгандыр...
Тәнәфес игълан ителде. Конгресс делегатлары һәм кунаклары төшке ашка һәм намазга таралды. Шәт, төштән соң барысы да җыелыр...
Кырым Дәүләт шурасы урынбасары Рәмзи Ильясов 2014 елдагы вакытларны искә алды. "2014 елда җинаятьчел Украина кырымтатарларын низагка кертеп җибәрергә тырышты, башка милләтләргә каршы котыртты. Бу катлаулы вазгыятьтә Татарстан, Конгресс ярдәменә ихтияҗ зур иде. Низагка кереп китмәвебез - уртак казанышыбыз", диде ул.