Татарстанда тел низагы калкып чыгып, республиканың дәүләт теле мәктәпләрдә ихтыярига калдыру карарын кабул итүгә бер ел тула. Азатлык узган ел вакыйгаларын искә алып, туган тел итеп татар телен сайлаган урыс ата-аналары белән әңгәмәләр тәкъдим итә. Беренче әңгәмәдәш – Светлана Фурутина, белеме белән лингвист, Казан кызы. Ире белән бер кыз бала тәрбияли. Балалары Казанның 12 санлы мәктәбендә белем ала. Бу мәктәптә укучыларның күпчелеге татар булса да, туган тел итеп урыс телен сайлаган. Светлана Азатлыкка бер ялгызы татар телен өчен көрәшүе турында сөйләде.