1 ноябрьдә Казанның Яңа татар бистәсе зиратында бер төркем зыялы, татарның танылган композиторы Сара Садыйкова каберенә чәчәкләр салып аның туган көнен (1 ноябрь 1906) искә алды. Чара барышында Сара Садыйковага Казанда әле дә һәйкәл куелмау мәсьәләсе күтәрелде. Аның кызы Әлфия Айдарская Азатлыкка хакимият әниемә һәйкәл куярга теләми, теләсәләр 1997 елда фәрман чыкканнан бирле куйган булырлар иде инде, һәйкәл булачагына мин ышанмыйм, диде. Ул шулай ук Татарстан мәдәният министрлыгының ябык булуына, мәдәният министры һәм аның урынбасарлары белән очрашу мөмкинлеге бетүгә зарланды.