Forbes-ның Русиядәге иң бай гаиләләре рейтингы унлыгына Татарстанның беренче президенты Миңтимер Шәймиев уллары кергән. Шәймиевләр гаиләсе исемлекнең алтынчы баскычында, гаиләнең гомум байлыгы $3 миллиард.
"Татавтодор" баш мөдире 59 яшьлек Айрат Шәймиев байлыгы $ 1,45 миллиард дип бәяләнә. ТАИФ мөдирләр шурасы әгъзасы Радик Шәймиевнеке — $ 1,5 миллиард. "Татарстанның кече нефть ширкәтләре" белән идарә итүче Тимур Шәймиев $ 40 миллион эшләгән диелә.
Айрат һәм Радик Шәймиевләр ТАИФны "Сибур"га сатарга җыена. Килешү якын араларда имзаланырга тиеш. Бертуган Шәймиевләрдән тыш, ТАИФка миллиардерлар Рөстәм Сүлтиев һәм Альберт Шиһабетдинов хуҗа.
Forbes рейтингының башында Wildberries онлайн сату кибете хуҗалары Татьяна һәм Владислар Бакальчуклар тора. Кибетнең төп хуҗасы — Татьяна Бакальчук, ире ширкәтнең бер процентын тота. Былтыр Forbes Wildberries-ны $ 1миллиард тора дип бәяләгән иде. 2021 елда $ 13,1 миллиардка җиткән. Шулай итеп, Татьяна Бакальчук Русиянең иң бай хатын-кызлары, ә аның гаиләсе иң бай кланнар рейтингларын җитәкли.
Икенче урында "Фосагро" ширкәте хуҗалары, агробизнес һәм ашламалар белән шөгыльләнүче Гурьевлар гаиләсе. ($ 6,9 млрд). Өченчедә — төзелеш өлкәсендә эшләүче Ротенберглар ($ 5,9 млрд).
Рейтингка шулай ук Гуцериевлар ("Сафмар") һәм Евтушенковлар (АФК "Система") кергән.
Рейтингка кергән гаиләләрнең гомум байлыгы былтыргы $ 16,1 миллиардан $ 42,9 миллиардка җиткән.
2019 елда бертуган Шәймиевләр Forbes рейтингында өченче урында, ә былтыр дүртенчедә иде.
🛑 Әгәр сезнең провайдер безнең сайтны томалап куйса, аптырамагыз, телефон йә планшетыгызга Азатлыкның RFE/RL әсбабын йөкләгез (App Store һәм Google Play кибетләрендә бушлай) һәм татар телен сайлагыз. Без анда да ничек бар, шулай!
🌐 Шулай ук, безнең Telegram каналына кушылырга онытмагыз!
