Халыкара агентлар Русиянең кредит рейтингларын төшерә
Moodyʼs агентлыгы Русиянең чит ил һәм үз иленең акча берәмлегендә бурыч йөкләмәләре рейтингын алты баскычка төшерде: "Baa3"дан "B3"кә.
Элегрәк Fitch агентлыгы да Русиянең чит ил акча берәмлегендә эмитент дефолты рейтингын "ВВВ" дәрәҗәсеннән "В"га төшергән иде. "B" рейтингы илдә дефолтның югары ихтималы булуын аңлата.
Украинада хәрби вазгыять (BBC хәбәрчеләре):
- Киевта берничә шартлау яңгырады. Аларның берсе – АКШның CBS телеканалының туры эфирында булды.
- Херсон мэры Игорь Колыхаев сүзләренчә, Русия гаскәре шәһәргә кергән, ләкин шәһәр украин байрагында кала.
- Украина төньягында, Чернигов шәһәрендә ике ракет хастаханәгә эләккән, дип хәбәр итә җирле хакимият вәкилләре.
- Харьковта атышлар дәвам итә. Дистәләрчә корбан һәм яраланучы турында хәбәр ителә.
- Зеленский ватандашларына мөрәҗәгатьтә Украина армиясе Русия һөҗүмен туктатуны уңышлы башкара дип хәбәр итте.
- АКШ күзләү оешмасына хәбәр иткәнчә, Киевка таба юл тоткан күп километрлы Русия техникасы колоннасы билгесез сәбәпле туктаган.
Канада "Роснефть" һәм "Газпром"ның ун вәкиленә карата санкцияләр кертә. Чикләүләр бу ширкәтләрнең мөһим кешеләренә карый, дип хәбәр ителә.
Моннан тыш Япония 4 Русия банкының активларын туңдыра: "Открытие", Новикомбанк, Совкомбанк һәм ВТБ.
3 мартта Якутскида "Все для вас" газеты "Сугышка юк" дигән кара тышлык белән чыкты
Горпечать оешмасында тиражны әлегә сатудан баш тартканнар. Янәсе, газетта шигарь бар, газеттан аңа рөхсәт булуын сораганнар.
3 март иртәсенә төп хәбәрләр:
- БМО мәгълүматына күрә, бер атнада Украинадан миллионнан артык кеше китәргә мәҗбүр булган.
- Һаагтагы халыкара мәхкәмә Русиянең Украинадагы ихтимал булган хәрби җинаятьләрен тикшерә башлаган.
- Зеленский мәгълүматына күрә, бер атнада Русия армиясе Украинада 9 меңләп солдатны югалткан. Русия саклану министрлыгы 498 һәлак булган кеше турында белдерә.
- Халыкара банк Русия һәм Беларуста программнарын туктаткан.
- Һамбургта Алишер Усмановның Dilbar яхтасын конфискацияләгәннәр. Аның бәясе 600 миллион доллар дип исәпләнә.
- Oracle, Mercedes-Benz һәм H&M Русиядә сатуларны туктатып торалар.
Зеленский 9 меңгә якын Русия хәрбиенең үтерелүен белдерде
“Безнең армия, дошманны тәмам сындыру өчен, мөмкин булганның барын да эшли. Бер атна эчендә тугыз меңгә якын русияле”, диде президент.
Аның әйтүенчә, илнең көньягындагы Николаев шәһәре тирәсендә Русия үзенең һәлак булган хәрбиләрен дистәләрчә боралак белән ташый.
Зеленский Русия хәрбиләренең күпчелеге алып кителмәвен, җир өстендә ятып калуын әйтте.
“Украина җирләре хәрбиләр җәсәдләре белән капланырга теләми. Бөтен армиягез белән кайтып китегез! Җитәкчеләрегезгә яшәргә теләвегезне, үләргә теләмәвегезне әйтегез. Сугышны мөмкин кадәр тизрәк туктатырга кирәк”, диде Зеленский.
5 марттан Тольяттидагы АвтоВАЗ заводында машиналар чыгару, детальләр җитмәү сәбәпле тукталыла, дип хәбәр итә “Ведомости” газеты.
АвтоВАЗ чыгарган машиналарның Bosch җитештергән мөһим блоклары булган микроэлектроник өлешләре җитмәскә мөмкин. 1 мартта Лада машиналарының бәясе уртача 15 процентка күтәрелгән иде.
Көн саннары
- Русия Саклану министрлыгы бүген беренче тапкыр Русия армиясенең Украинадагы югалтуларын игълан итте — 498 хәрби һәлак булган, 1597се яраланган.
- Русия Саклану министрлыгы Украина ягындагы югалтуларны да китерә — 2870 кеше һәлак булган, 3700гә якыны яраланган диелә.
- Украина Саклану министрлыгы исә Русия ягында 5840 һәлак булган дип белдерә.